Ka Jylla Meghalaya ka la ïoh ban lum ïa ka khajna palat 300 klur ha u snem 2022-23 na ka jingdie ïa kyiad ne ka na tnad Excise Department. Na ka por sha ka por ka sorkar ka pynpaw ba ka long kaba bymlah long ban khang noh ïa ka kyiad ha ka jylla Meghalaya namar ba kadei kawei na kiba ai jingmyntoi tam ïa ka jylla bad kaba kyrshan ïa ka ïoh ka kot jong ka jylla hi baroh kawei. Nalor jong kiba bun kiwei pat ki jaka bad ki thaiñ kiba ki dukan die kyiad ne ki Wine Store ki jylla bha ka thaiñ Polo Sawphyrlong kadei kawei na ka ktem die kyiad ne ka Wine Hub kaba shyrkhei tam hapoh jong ka Nongbah Shillong, ha kaba ym lah ban len ki la bun ki dukan kyiad ban ia ki dukan sha sha katei ka thaiñ. Hynrei tang kita ki longïing ne ki dpei ïing kiba sngewthuh ba haduh katno ka kyiad ka pynjot thiaw ïa ka ïing ka sem bad ka imlang sahlang.
Ha ka jingpyrshang ban twad jingmut bad kiba bun ki longïing longsem bad kren shaphang katei ka jingduh jingkyrmen ba ym lah ban leh ei ei ban pynduh ïa ka kyiad na ka liang jong ki katto katne ki riew pyrkhat ki la pynpaw ba ka la dei ka por ba ka sorkar ka dei ban leh ei ei halor kane ka phang ban pynbha pat ïa ka rukom dih kyiad jong ki briew. Kata ka long ba ka sorkar ka dei ban peit ba ka kyiad kam dei ban wanrah ïa ka jingpynjot hynrei ban buh kyndon ba wat ki nongdih ruh ki dei ban don noh da ka Laisen kumba long ki nongdie hi. Lada ka sorkar kan leh ha kane ka rukom kan ïarap shibun ïa ka imlang sahlang bad kan lah ban teh lakam shibun ki jingjia ba sngewsih.
Ka Laisen na ka bynta kito kiba dih ne pyndonkam ïa ka kyiad ka dei ban long da ki kyndon bad ki briew kin hap ban dih kat kum u pud ba la buh beit ka ban long kat kum ka jingkoit jingkhiah ne ka jingailad ka met jong ki. Ki nongdih kidei ruh ban don ïa ka syrnot kaba biang na ki doktor ba haduh katno ki lah ban dih ïa ka kyiad kat kum ka jingkhlaiñ ne ka jingailad ka bor met jong ki. Ka jingai Laisen ïa ki briew ban dih kyiad ka dei run ban long kat kum ka ïoh ka kot bad ka jingkamai jong ki, khnang ban pyrkhing ïa kito ki longiing kiba duna jingmih ba kin lait na ka jingïakynduh jingeh ha ka longïing longsem.
Ki nongdih kyiad ki dei ban pynthymmai la kumno kumno man la ka lai bnai ne hynriew bnai ïa ka jinglong ka jingkoit jingkhiah ka met jong ki khnang ba ka jingdih kyiad jong ki kan long kaba myntoi bad kaba don jingmut, ym kaba shu dih kutlad. Namar ngim lah ban len ba ki don shibun ki briew kiba la shu dih kyiad pathar wat haba ka met jong ki kam ailad shuh ruh bad kane ka wanrah ka jingeh kaba khraw haduh ba kim lah suh ban teh lakam la ka jong ka jingim bad wanrah ka jingjia ba sngewsih sha ki longïing kiba khmatam haba uba dih u dei u kpa uba kyrshan ïa ka longïing longsem.
Ka kyiad ngi la ïohi ba ka long shisha kawei na ka nongshun kaba khraw tam jong ki longïing longsem bad ruh ka imlang sahlang, hynrei kaba kham shyrkhei ïa kane ka dei u drok uba la pynkylla wat ïa ka ri America ruh kum kawei na ki ri kiba duk tam ha ka pyrthei, ha kaba ka long ka bymlah ban ngeit ban ïohi bad ki phareng ne ki dohlieh kin im da ki hajar hajar ngut khlem ïing khlem sem hynrei shuthiah ha ki surok jong ka Los Angles bad ruh Philadelphia. Ym lah ban mutdur ba ka ri kaba riewspah tam ha ka pyrthei mynta ki briew pat ki long kiba ïap wat haba ki dang im ruh kiba ka khlieh jong ki hi kam treikam shuh bad ki im ha surok kum ki zoombies. Kane ka long ka jingmaham kaba shyrkhei shisha ïa ka imlang sahlang ha kine ki sngi kiba mynta ha kaba wat hangne ha ka jylla Meghalaya bad ka nongbah Shillong ruh ngi la sdang ban sakhi ïa ka jingshyrkhei jong une u jingdih pynbuaid bad pynïap syndon ïa kito kiba pyndonkam ïa u.
Kum ka imlang sahlang bad ruh ki nongshnong shnong jong ka jylla Meghalaya ka la dei ka por ba ngi donkam shisha ban leh ei ei shuwa ba ka por kan dier wat ha kane ka thaiñ jong ngri ruh. Lyngba ki Social Media bad Internet, ha kine ki sngi ym don ei ei shuh kaba rieh hynrei baroh ki sakhi ïa kine ki kam kiba shyrkhei shisha. Lada ka ri America kan lah ban teh lakam ïa ki jingpynjot jong u Drok hato kam long ka jingmaham ba khraw ïa ka ri bad ka shnong kaba dang sahdien kum kane ka ri bad ka jylla jong ngi. Shisha ka long ka jingbahkhlieh jong ngi shimet shimet ban phikir bha ïa la ka jong ka ïng ka sem, ka shnong ka thaw bad ka ri bad ka jaidbynriew.
