Kyrpad u Conrad ïa u Himanta ban phah tohkit ba shah pynïap u Niksamseng ha Goalpara

Shillong, Naitung 09: U Myntri Rangbah ka jylla u Conrad K Sangma u la kyrpad ïa ka jingtuklar jong u Myntri Rangbah ka jylla Assam u Himanta Biswa Sarma ban thung da ka kynhun tohkit haor ka jingkynnoh ba shah pynïap u (L) Niksamseng Ch Marak hapoh ka rehabilitation centre ha Goalpara.
Ha ka shithi ba la phah sha u Sarma, u Sangma u la ong ba u nongshong shnong ka jylla Meghalaya u (L) Niksamseng Ch Marak, u la shah kem da ki pulit ka Assam ha ka 2 tarik mynta u bnai, 2024 bad la phah sah hapoh ka Rehabilitation centre kaba ha Goalpara Assam.
Hnyrei hadien arsngi la lap ba u la ïap hapoh kane ka centre – ka ‘New Life Foundation Centre, Nayapara, Goalpara’, halor ki jingkynnoh ba ka don ka jingsuba ba dei kaba la shah pynïap.
Kumba la ïathuh da ki dkhot jong ka ïing ka sem, ki nongpynïaid ka centre ha kaba sdang ki la kam ba kadei ka jingjia ba shim ïa la ka jong ka jingim, hynrei kham hadien ki la pynkylla ïa ka jingkren jong ki, ha kaba kane ka la wanrah ka jingsngewkhia halor kane ka jingjia bad ka jingkylla ktien jong ki.
“La pyntip ïa nga ba ka met jong u la lap ba ki la don ki dak mong ba kynthup ïa ka dak shah dung tari ha ka bynta jong ka diang jong ka durkhmat jong u, nangta ki dak pdung ding, ki dak mong bajur bha ha ki bynta jong ka tmoh, ka syngkai bad ki kjat. Ki dak mong ki la pynpaw ba u (L) Niksamseng u la shah pynsajia bha, u la shah bom bad shah dung hapoh kane ka rehab centre,” u la ong.
“Kumta halor kitei ki jingjia, nga kyrpad ïaphi ban sdang noh da ka jingtohkit kaba mardor halor kane ka jingjia, kaba la kwah ruh da ki dkhot ka longïing ban pynïoh ïa ka hok ïa une u lanot,” bynrap u Myntri Rangbah.
U la ong ba ki dkhot ka ïing ki la ujor da ka FIR halor kane ka jingjia bad ka long kaba kongsan ba u Myntri Rangbah ka Assam un shim khia ban phah tohkit halor kane ka kam.
U Myntri Rangbah u la pynpaw ka jingïaroh ïa ka National People’s Youth Front (NPYF) kaba la buddien ïa kane ka jingjia kaba long kaba donkam bha ha kane ka por.