Ai jingthoh u bah R.M Shabong sha u Myntri Rangbah ba tuid ka khyndew sboh sha Bangladesh

Shillong, Naitung 8 : U bah RM Shabong, uba dei u nongshong shnong jong ka Umniuh Tmar, Riwar Mihngi, ula thoh sha U Conrad K Sangma, myntri rangbah ka jylla, halor ka jingtuid ka khyndew sboh, kaba ïai bteng na ka thaiñ Riwar Mihngi sha Bangladesh bad katei ka la buh ïa ka jingtyrkhong kaba jur sha ka thaiñ bad kaba la pynduh pyndam lut ïa ka rep ka riang sha ka thaiñ, kaba wanrah ïa ka jingnang khluit ka mariang bad nangta sa ka jingtyrkhong ka umbam umdih.
Ha katei ka dorkhas, utei u rangbah, ula sot ruh ïa ka kaiphod jong ka Indian Institute of Technology, kaba la wad bniah da ki arngut ki stad, ba kynthup ïa u Ravi Raj bad U Manabendra Saharia, ha kaba ki la pyni ruh ba ka East Khasi hills, ka dei ka jaka kaba ka jubor bha ha ka jingtuid noh ka khyndew bad kaba poi sha ka 164.52 million ton ha ka shisnem ha ka shi hectare ka jingdon ka khyndew bad katei ka dei ka dak jong ka jingma kaba khraw, katba kum katei ka kaiphod bad katei kan pyntwa ïa ki ïing ki sem, ïa ki surok bad kiwei ki jingtei bad kan pynjulor jur ïa ka rep ka riang.
U bah RM Shabong, u kyntu ïa u myntri rangbah ka jylla, ba un ïakren ïa kane ka mat bad ka sorkar India, na ka bynta ban khanglad kyrkieh ïa ka jingtuid noh ka khyndew sboh na ka thaiñ.
Lah ban pynkynmaw, ba ha ki snem 1990, ka Riwar Mihngi Development Council (RMDC), ka la ïakren bad ka sorkar Meghalaya, lyngba ka tnat Soil Conservation, na ka bynta ban thaw da ki kynroh ha ki bri ki bsah ban pynneh ïa ka khyndew ha ka thaiñ bad ha katei ka por, ka sorkar jylla, ka la mang pisa, na bynta kitei ki kynroh bri, hynrei kaba lyngngoh, ka long ba kam shym la poi satia shaei shaei ruh.