Shillong, Naitung 08: Haduh 31 ngut ki nongïalehkai Karate hapoh ka lama jong ka Meghalaya State Karate-Do Federation (MSKDF) ki la lah ban wanrah nam bad burom ïa ka Jylla hadien ba ki la ïoh khur haduh 60 tylli ki takma ha ka lympung ïalehkai Karate kaba ar sngi lynter kaba dang shu kut ha ka Sngi U Blei, kata ka ‘National Zendokai Karate Championship’.
ïa kane ka lympung la sdang ha ka 6 tarik bad la pynhap pyrda noh hynnin ka 7 tarik Naitung, 2024 ha Assam Rifles Indoor Stadium Agartala, Tripura, bad la pynlong ïa ka da ka Tripura Zendokai Karate Association ha ka jingïatreilang bad u Inspector General ka Assam Rifles ryngkat ka jingkyrshan jong ki synjuk jong ka All India Zendokai Karate Association kaba dkhot jong ka International Zendokai Karate Association kaba la ithuh da ka Karate India Organization (KIO), hapoh ka shatri jong ka World Karate Federation (WKF), Asian Karate Federation (AKF), Common Wealth Karate Federation (CKF), South Karate Do Federation (SAKF) & International Olympic Committee(IOC).
La wan sakhilang ïa kane ka lympung da u Tinku Roy , Myntri ka tnad ïalehkai ka Sorkar Tripura. Haba ai jingkren ha kane ka sngi, u la pynpaw ïa ka jingkongsan jong ka Karate bad kiwei kiwei ki jinghikai Martial Arts na ka bynta ki samla jong kane ka pateng kaba mynta khamtam eh na ka bynta ki kynthei ban tei ïa ka jingshaniah kum ki nongshong shnong jong ka ri.
ïa kane ka prokram la pynlong ha ka jingïadonlang u Colonel Qinam Abash Singh Commandant 18-Assam Rifles, Agartala Tripura
bad u President bad General Secretary jong ka All India Zendokai Karate-Do Federation – D.R.Ranee, bad u Dr.Moirangthem Ibomcha lem bad kiwei kiba la shayh khot sngewbha.
Related Posts
Lah ban kdew hangne ba u Tinku Roy dang shen u la mynjur ïa ki 13 tylli ki Khelo India centre ha ki 8 tylli ki District bad la plie ïa 41 tylli ki coaching centre bad kynthup ruh ïa ka jingïakop ïalehkai tynrai ha ka prokram ba man la u snem jong ka ha Tripura.
Ha ka Sngi pynhap pyrda bad sam khusnam la wan da u Lat ka Jylla Tripura, Indrasena Reddy Nallu ha ka jingïadonlang u Inspector General jong ka 18-Assam Rifles bad kiwei de ki riew pawkhmat. U Indrasena Reddy Nallu u la sam ïa ka khusmna lahduh sha ka Manipur, nangta ka 1st runner’s – up Trophy sha ka kynhun Karate jong ka Meghalaya Karate bad ruh ïa ka khusnam Best Karate Fighter ba la khur da u Francis R.R.Songthiang jong ka Meghalaya jong ka 7th Zendokai National Karate Championship.
Nalor kane, u Francis u la ïohpdiang ruh ïa ka 3rd Degree Black Belt Certificate ha ka Zendokai Karate-Do na u Examiner Dr.Moirangthem Ibomcha u ba dei kyrdan 7th Degree Black Belt ba la ithuh ha ka International Zendokai Karate Certificate Holder.
Ki la don haduh 10 tylli ki jylla na kylleng ka ri kiba la wan ïashimbynta sha kane ka Karate-Do Championship. Ha kaba ïa ka namlahduh la ïohrah da ka Manipur, 1st Runner’s-Up da ka Meghalaya katba 2nd Runner’s-Up trophy la khur da ka Tripura Zendokai Karate Team.
Ka kynhun ki nongïalehkai karate ka Meghalaya ki la ïoh ban khur 60 tylli ki takma na kane ka Championship baroh ha ka Kumite bad Kata – Individual & Team , kiba kynthup ïa 32tylli ki takma ksiar, 21 tylli ki rupa bad 7 tylli ki Rnong.