Shillong, Naitung 07: Ka jingshlei um hapoh ka Jylla Assam ka la shim haduh 52 ngut ki jingim bad kane kadei katkum ka jingkhieñ haduh 5 tarik mynta u bnai, watla ka jingshah pynjulor ka dang ïai bteng haduh mynta.
Napdeng kiba la khlad namar ba shlei um ki kynthup ïa uwei khynnah ha Guwahati bad shikmie shikhun ha Khanapara kiba la khlad namar ba twa khyndew.
Ka wat ba-ar jong ka jingshlei um ka la ktah ïa 24,20,722 ngut ki briew ha ki 3,518 tylli ki shnong jong ki 30 tylli ki district.
Ki district ba shah ktah ki kynthup Cachar, Kamrup, Hailakandi, Hojai, Dhubri, Nagaon, Morigaon, Goalpara, Dibrugarh, Nalbari, Dhemaji, Bongaigaon, Lakhimpur, Jorhat, Sonitpur, Kokrajhar, Karimganj, South Salmara, Tinsukia, Charaideo, Barpeta, Karbi Anglong, Golaghat, Sivasagar, Chirang, Majuli, Biswanath, Darrang, Karbi Anglong West bad ka Kamrup.
Haba ïadei bad kane, ki bor sorkar kila la lah ban buh haduh 273 tylli ki jaka sah kyrpang (Relief Camps) bad 339 tylli ki jaka sam jingïarap lane ki (Relief Distribution Centers) ban ïarap ïa ki ba shah ktah.
Bun tylli ki wah kynthup ka Brahmaputra ki la heh bha namar ka jingïai kiew ka um shaduh u pud ka jingma. Kane ka jingkiew ka um ka la jur eh ha ki thaiñ Neamatighat, Goalpara, Guwahati, bad Dhubri.
Kiwei ki wah kiba sdang kiew ka jingdon um ki kynthup ka Burhidihing ha Chenimari (Khowang), Dikhou ha Sivasagar, Disang ha Nanglamuraghat, Dhansiri ha Numaligarh, Jia-Bharali ha NT Road Crossing, Kopili ha Kampur bad Dharamtul, Barak ha Fulertal bad AP Ghat, Katakhal ha Matizuri bad ka Kushiyara ha Karimganj.
