Shillong, Naitung 06: U Myntri Rangbah ka Jylla u Conrad K Sangma ula leit jurip ïa ki jaka kiba shah ktah ha ka jingshlei um ha West Garo Hills, kaba la ktah ruh ïa kumba 30,000 tylli ki longïing.
Ha ka jingjurip ïa kitei ki jaka, u Conrad Sangma ula khmih ïa ka jinglong jingman bad ïa ki lad ai jingïarap na ka liang ka bor pynïaid district sha ki lanot kum ha Silkata, Namabila bad Haripur.
Ka Wah Jinjiram kaba tuid najan jong kitei ki shnong ka la kiew bad kane ka Wah ka la mih na ki bynta jong ka Goalpara District jong ka Assam bad ka la ïaid lyngba ka Goalpara bad South Salmara district jong ka Assam bad ka la rung shapoh West Garo Hills bad nangne ba ka leit pynïasoh bad ka wah Brahmaputra.
Ha ki katto katne ki jaka, ka jingkiew ka um ka la kot sha ka 5 haduh 6 phut bad katei ka um ka la leit rung ha ki ïing ki sem bad kala tap ruh ïa ki jaka rep ka riang.
“Ka long ka jingjia kaba sniew ha kaba kumba 30,000 tylli ki longïing ki la shah ktah na ka jingshlei um ha katei ka thaiñ, hynrei kam shym la don pat kano kano ka jong duh noh ïa ka mynsiem briew kumba long haduh mynta,” ong u Conrad Sangma hadien ka jingkhmih bniah ïa ka jinglong jingman na ka jingshlei um.
U la ai ka jingïaroh ïa ka bor pynïaid district ha kaba ki ophisar ki la treikam mardor ban pynthikna ba kan ym dih ïa ka jingim briew bad ki la ai ruh ïa ka jingïarap ïa ki paidbah kiba la shah ktah bad la ai ruh ïa ki ïa ka jaka sah kaba shipor.
“Haba don kano kano ka jingma, ki bor District ki la pynkynriah noh mardor ïa ki riewshimet sha ki jaka kiba shngaiñ bad sha ki shelter home bad ki dang khmih bin pa bin ïa ka jinglong jingman,” ong u Conrad.
U la ong ba ka sorkar kan ai jingkyrshan ïa kito ki lanot kiba la shah ktah.
U Sangma ula sam ruh ïa ki marbam mardih sha ki paidbah ha katei ka thaiñ. Ula leit ruh ban ïakynduh ïa ki paidbah kiba sah ha ki jaka riehtngen kiba shipor bad ula bthah ïa ki heh ophisar ba kin ai jingïarap mardor.
U Myntri Rangbah ula bthah ruh ïa ki ophisar sorkar ban ïatreilang bad ka jylla Assam ruh bad ban pan ïa ka kaiphod khnang ba kin lah ban pynkhreh bha ïalade lada jia ba ka jingshlei um kan nang jur bad sniew shuh.
