Syrtok ki paid ka War Jaiñtia ba sangeh pyntrei ïa ka surok Kudengrim-Kudeng Thymmai

Jowai, Jylliew, 30: Kum ba ong ba ka surok ka dei u budlum jong ka roi ka par ha ka shnong ka thaw, hynrei ki nongshong shnong jong ka War Jaiñtia ki iakynduh mawsiang ha ka leit ka wan bad ka rah ka rong khamtam eh ha ka pang ka shitom namar ka jingsangeh u Kontraktor ban pyntrei ïa ka surok na Kudengrim sha Kudeng Thymmai, West Jaiñtia Hills District.
Ïa kane ka surok kaba pynïasoh na Kudengrim sha Kudengthymmai la buh mawnongrim da u MLA ka Amlarem Constituency u Bah Lahkmen Rymbui ha ka 30 tarik, Nailar, 2022 bad ka jingshna ïa ka surok kaba jrong 5.14 kilomitar na Kudengrim sha Kudengthymmai la bei tyngka da ka New Development Bank (NDB) lyngba ka Meghalaya Eco Tourism Infrastructure Development Project (METIDP) kaba kot T. 18.53 klur bad la buh thong ban pyndep ha ka 5 tarik, Jylliew, 2025 katkum ka Detailed Project Report (DPR) hadien ba la aiti ha u Bah Khlurstep Pakma kum u Kontraktor.
Kumba long mynta ka thaiñ Kudengrim ka la long shisha ka shnong kaba riewspah bha da ka jingdon ki jaka jngohkai pyrthei kiba itynnad, naduh ki lum ki wah, ki jingkieng jri nalor kiwei kiwei. Hynrei mynta ki paidbah jong ka shnong ki shem jingeh pynban na ka jingpyntrei ïa ka surok na Kudengrim sha Kudengthymmai namar ka jingsangeh noh jong u Kontraktor ïa ka kam, nalor ka jingdap ktieh ka surok kaba la khanglad ïa ki kali rit ban ïaid lynti.
U Waheh Shong ka Kudengrim Bah Mondew Pohtam ha ka jingkren bad ki lad pathai khubor ha ka jingleit jurip ïa ka surok ha ka sngi Saitjaiñ u la ong ka jingieh syndet jong u Kontraktor ïa ka kam ka la wanrah jingeh ïa ka shnong hi baroh kawei wat kumjuh ïa ki shnong ba marjan.
U la ong ha ka por slap ka jingbtuit jong ka surok hashwa ban rung shapoh shnong kala jur bha. U la ong ruh ba kumshnong ka la dep pynsngew sha u Kontraktor bad kumjuh sha ki ophisar ka tnad PWD hynrei ym don ba sngap satia ïa kane ka jingeh. Hynrei tang ban lait kin kali ki nongshong shnong ki la hap ban pynkhuid dalade ïa ka ktieh bad ïa ki maw heh kiba hap hapdeng surok.
“Kum ha kane ka por ba jur bha u slap, ka donkam bha ïa u Kontraktor ban pynkhuid noh ïa ka ktieh ha ki bynta jong ka surok hashwa ban poi sha ka shnong,” ong u Bah Pohtam bad bynrap bad jingwan jong kane ka projek surok na Kudengrim sha Kudengthymmai ka la wanrah ka jingkmen kaba khraw eh, hynrei ka kam pat ka dang sangeh bad sahteng la ar snem mynta naduh ba la buh ïa u mawnongrim.
Ki trai shnong ki la pynsngew ruh ba ynda ladep ban pynshna ïa ka surok Kudengrim sha Kudengthymmai kan long ka jingmyntoi kaba khraw eh namar kim donkam shuh ban leit shaduh Amlarem kaba jngai 26 kilomitar eiei na Kudengrim hynrei lyngba kane ka surok ka la pynduna ruh ïa ka jingjngai ban poi sha ka jaka sumar CHC bad College kaba don ha Nongtalang bad sha u surok NH-40 E ban poi sha Dawki.
U Adviser jong ka Synjuk ki Waheh Shnong ka War Jaiñtia Bah Kolmen Pohshna, u Waheh Shnong ka Sohkha Shnong Bah P.S Suchen, Waheh Shnong ka Lamin Bah Golden Gashnga bad u Waheh Shnong ka Kudeng Thymmai Ba Barister Paswet ki la pynrem jur ïa ka jingbym shim khia jong u Kontraktor ban trei pyndep ïa ka kam kaba la sah teng la ar snem mynta bad ka la buh jingeh ïa ka leit ka wan ki paidbah.
Ki nongïalam shnong ki la kren shai lada u Kontraktor um lah shuh ban trei shuh ïa ka kam, ula dei ban weng noh shi syndon ïa ka kam, khnang ba ka Sorkar kan ïoh ban khot Tender noh da kaba thymmai.
Kumba long mynta ki paid jong ka shnong War Jaiñtia ki la sngew donkam ban pyndep kloi ïa ka surok kaba lah ban wanrah shibun ki jingmyntoi naduh ka leit ka wan, ka kit ka bah ban pynpoi ïa ki mar rep, ka koit ka khiah, ka pule puthi bad ka kam jngoh kai pyrthei.
Ki la kyntu ruh ïa u MLA Bah Lahkmen Rymbui ba un ïarap lem ban buddien ïa kane ka kam khnang ba kan long ka jingmyntoi ïa ka shnong Kudengrim, Kudengthymmai bad ïa bun tylli ki shnong ba kynthup naduh ka Khonglah, Nongbareh, Amkoi, Sohkha bad kiwei kiwei ki shnong ba marjan.