Shillong, Jylliew 29: Da ka jingthmu ban ïada ïa ka bha ka mïat jong ki briew bad ban ai jingtip sha ki briew ka Telecom Regulatory Authority of Indïa, Regional Office Kolkata ka la pynlong ïa ka Consumer Outreach Programmme ha Nongtalang College, Nongtalang, West Jaintïa Hills district, Meghalaya.
Ka jingthmu ba kongsan jong ka prokram kalong ban ai jingtip ïa ki paidbah shaphang ki sienjam bapher bapher ba la shim da ka TRAI ban ïada ïa ka bha ka mïat jong ki briew.Ka Kong G. Shabong, CCA, NE-I, Department of Telecom ka la kren shaphang ka jingdonkam ban pynlong kum kine ki prokram ha ki jaka jaka kiba don sha kyndong bad kiba jngai kum ka Nongtalang.
Ka la kyrpad ïa ki samla pule ban long kiba laitluid ban pynsngew ïa ki jingeh jong ki shaphang ka jinglong ka network ha kane ka prokram khnang ban lah ban weng ïa ki jingeh.U D. Pandey, SDPO, Amlarem ha ka jingai jingkren jong u, u la kyrpad ïa ki samla pule kiba don ha ka jingïalang ba kin ai ka jingsngew jong ki shaphang ka jinglong ka network ha kane ka thain.
Kum kine ki jingai jingmut kin ïarap ïa ka TRAI bad kiwei kiwei kiba don bynta ha kane ka kam ban weng ïa ki jingeh.U Dr. Ryan Reid Kharkongor, Principal, Nongtalang College, Nongtalang haba ai jingkren ha ka jingïalang, u la ïaroh ïa ka sienjam ba la shim da ka TRAI ban pynlong ïa kum kane ka prokram ai jingtip na ka bynta ka bha ka mïat jong ki briew ha ka thain Nongtalang.
U la ban ïa jingkongsan ban don ka jingpynïasoh mobile kaba bha ha jaka jong ka college bad u la kyrpad ïa ki nongai jingshakri ban pynthikna ïa ka jingpynïasoh kaba bha ha ki por ban wan.
U la pynpaw ka jingsngewkhïa halor ka jingdon ki mobile network kalong kaba dang duna ha ka thain bad kam don ka line kaba pura.
Ha kane ka prokram, lyngba ka jingpynshai jong u Debjit Saha, SRO, TRAI, ki nongïashim bynta ki la ïoh jingtip shaphang ki kyndon kiba ïadei bad ki nongthied jingthied, ki jingbthah bad ki hukum ba ïadei bad ki Value Added Services (VAS), Unsolicited Commercïal Communications (UCC), Mobile Number Portability (MNP), Complaint Redressal Mechanism, Data services and Tariff bad kiwei kiwei.
Ki nongïashim bynta ki la ïoh jingtip ruh shaphang ki jingmyntoi jong ki Mobile App bapher bapher (TRAI MySpeed app, TRAI DND 3.0 app bad ka TRAI Mycall app), Tariff portal bad ki Network coverage map ba la shna da ka TRAI ban pynkupbor ïa ki briew bad kumno ki briew ki lah ban shim kabu ïa kine ki app/rynsan.
Ki nongïashim bynta ki la ïoh jingtip ruh shaphang ki jingai jingmut bapher bapher jong ka TRAI ban plie lad ïa ka jingkyntiew ïa ki kam telecommunication bad shaphang ki kyndon/ ki jingbthah ba thymmai jong ka TRAI halor ka UCC bad kumno ba kin long kiba husïar ha kaba ïadei bad ki kam thok kum ka jingthok ha kaba ïadei bad ki tower, ki message bad ki jingphone ba ïalam bakla bad kiwei kiwei.
Ka la don ka jingpynshai na u D. Pandey, SDPO, Amlarem, tnat Pulit Meghalaya kaba u la ban ruh ïa ki bynta ba dei ban leh bad ban kïar da ki nongshong shnong ban ïada ïalade na ka jingngop ha ki kam beain lyngba ka bor internet.
Ka la don ka jingpynshai halor ki projek USOF, kynthup ka BharatNet bad ki projek 4G Saturation ha Jylla Meghalaya da u A. Das, O/o CCA TRAI.
Ha kane ka jingpynshai la pyni ïa ka jingïaid shaphrang jong ki projek USOF ha kane ka jylla.U Ashim Dutta, Jt. Advisor, TRAI u la kren halor ka phang ba ïadei bad ka rynsan Sanchar Saathi (sancharsaathi.gov.in), ka rynsan ba phaikhmat sha ki nongshong shnong ba la shna da ka DOT.
La pynshai shaphang ki atïar bapher bapher kum ka “Chakshu” (ka jingai jingtip ba ïalam bakla), CEIR (ka mobile ba la jah lane shah tuh), TAFCOP (ka jingdon ki mobile connection) bad kiwei kiwei, kiba long shi bynta ka rynsan Sanchar Saathi.
Hadien ka jingpynshai ka la don ka jingïalang ïamir jingmut ha kaba la jubab ïa ki jingkylli jong ki nongïashim bynta ba ïadei bad ki bynta bapher bapher jong ki jingai jingshakri telecom da ka kynhun jong ka TRAI/TSP.
