Shillong, Jylliew 19 : Ka Sorkar Jylla ha ka sngi Balang ka la shim ïa ka rai ban thung noh ïa ka Chairperson barim jong ka Meghalaya State Commission for Protection of Child’s Rights (MSCPCR) ka Kong Ïamonlang M Syiem kum ka Chairperson ba thymmai jong ka ka Meghalaya State Commission for Women (MSCW).
Ïa kane la pyntip da u Myntri ka tnad Social Welfare ka sorkar jylla ba dei ruh u nongai ktien ka sorkar, Bah Paul Lyngdoh hadien ba la wai ka jingïalang jong ka kynhun Myntri.
Haba kren bad ki lad pathai khubor, u Myntri u la ong ba ïa ka kyrteng jong ka Kong Ïamonlang la jied na ki 7 ngut ki kyrteng bad kumta ïa ka kyrteng jong ka la mynjur ha ka jingïalang jong ka Kynhun Myntri ba kan shimti noh kum Chairperson ba thymmai. U la pyntip ruh ba ka Kynhun Myntri ka la pynjlan ruh ïa ka rta ban long chairperson ha ka Commission na ka 65 snem sha ka 70 snem.
Ka Kong Ïamonlang ka dei ka Associate Professor (Rtd) bad HoD Sociology barim jong ka St. Edmunds College. Kane ka longkmie ka la shongthait ruh kum ka Chairperson ka Child Rights Commission ha ka 01 tarik Lber 2024, bad mynta kan shimti pat kum ka khliehduh duh jong ka Women’s Commission.
