Shillong, Jylliew 19 : Ka Kynhun Myntri ka Sorkar Jylla ha ka sngi Balang, kala mynjur ïa ka jingtyrwa ban pynkup bor ïa ki Deputy Commissioner ba kin shim rai halor ka Roster System hala ki jong ki jong ki District.
Haba ïakren bad ki lad pathai khubor hadien ka jingïalang, u Myntri ka Tnad Social Welfare Bah Paul Lyngdoh ula ong “Ngi la rai ban aibor lang sha ki DC ba kin rai halor ka Roster System hala ki District, kaba mut ïa ka jingsam bhah ïa ki kam ba lait”.
“Kim (DC) donkam shuh ban wanrah sha ka Tnad Personnel lane ka Sorkar Jylla, ban shim rai ba kano ka kam ka hap ha kano ka thup kat kum ka 80% ka bhah ia ki Khasi Jaintia bad Garo hala ki jong ki District” ula ong.
“Kane kan ïarap ban pynduna ïa ka jingbam por ha ka jingthungkam bad kan pynkupbor ruh ïa ki DC ban shim rai halor ki kam kiba lait hala ki District khlem da donkam shuh ban phah sha ka Sorkar Jylla” ong u Bah Paul.
