Mairang, ïaïong, 01: Ka jingkhie kynsan ka eriong erngit ha ka miet sngi u Blei ha kylleng ka Jylla ka la wanrah ïa ka jingïam kthang jong kawei ka longing ha ka shnong Mawroh Laitdom, Eastern West Khasi Hills District ha kaba u khun shynrang uba dang kumba 3 snem tam ka rta u la khlad noh hadien ba ka eriong kaba jur ka la jynrat ïa ka ing kaba ki shong ki sah bad bret ïa ki briew sha surok.
Ka kmie jong une u heprit uba la tip kyrteng kum u Wiki Lawriniang, ka la ïathuh ba ki la thmu ban pynkit noh ïa u sha Tirot Sing Civil Hospital, Mairang hynrei namar ka jingkhyllem jong ki dieng hapdeng surok ka la pynlong ïa ki kali ba kim lah shuh ban ïaid bad kumta ki la hap ban shu pynkit noh sha Laitdom PHC hynrei kaba sngewsih ka long ba une u heprit u la khlad noh ha kane hi ka hospital.
Katkum ka khubor ba la ïohlum, la ïathuh ba ki don haduh palat 80 tylli ki iing kiba la julor bad ki don ruh ki jingri kum ki sniang ki bym lah ïaid shuh namar ka jingshah ban ha ki synrum ba la pynkhyllem da ka eriong.
