Ka phutbol ba kham phylla, btin hi ki kmie kpa ïala ki khun ha madan shuwa ba kin ïalehkai
![](https://mawphor.com/wp-content/uploads/2024/04/WhatsApp-Image-2024-03-31-at-6.35.48-PM.jpeg)
Shillong, Lber 31: Ka Jongksha Social Cultural and Sports Club ha ka sngi Saitjaiñ jong ka taïew ba dang shu dep, ka la pynkut noh ïa ka First Quarter Football Tournament 2024 ha madan ïalehkai jong ka shnong Jongksha.
Ïa kane ka football tournament ba la bei tyngka da ka Yess Meghalaya kaba la sdang ha ka 28 tarik Lber bad kaba la pynkut noh ha katei ka sngi ka 30 tarik Lber 2024 la wan ban plie pyrda da u Bah T Mynsong Sordar Shnong Umtong bad ba la pynhap pyrda noh da u Bah T. Pohshna Chairman ka Block Mawkynrew kiba la long kum ki Kongsan.
Kumba ju long ba ha ka lympung ïalehkai kynjatbol naduh ka World Cup bad ki lympung ïalehkai kiba heh, ki player ki ju btin ïa ki khynnah rit ha madan shuwa ban sdang ka jingïalehkai, hynrei kane ka lympung ka long kaba kham pher bad kaba i shongkun bha ha kaba ki kmie ki kpa ki la wan synran bad btin hi ïa la ki khun hapdeng madan.
Ha kane ka jingïalehkai, ki kynhun kiba la poi sha ka final ha ka U-12, ka Inter Miami SC ka ïakhun pyrshah bad ka Real Madrid FC bad ha ka U-10 ka Sevilla FC pyrshah ïa ka Manchester United FC.
Ha ki jingïalehkai ba itynnad bad ba pynshohbiej bha da ki heprit, ka Inter Miami ka la pynliem noh da 2-0 kol pyrshah ïa ka Real Madrid FC ba la thep da u heprit Banteibor Songthiang bad da u Ronishan Marboh. Katba ha ka U-10, ka Sevilla FC ka la pynliem da 2-0 kol ïa ka Manchester United FC. Bad ïa kitei ki ar kol la thep da u heprit Jingtreikamlang Suting bad u heprit Ialanius L Nongbri.
Ha kaba kut jong ka jingïalehkai la sam ïa ki khusnam lyngba da ki takma bad la sam ruh ïa ki khusnam shimet lyngba da ki trophy sha ki rangap kol jong ki team kiba khur jingjop.
Ha kane ka sngi la ïoh jingkren na ki Kongsan kiba la ïaroh ïa ka Jongksha SC&SC hapoh ka jingïalam u Bah H. Suting uba la pynbit pynbiang ïa ki jingdonkam ban pynlong ïa katei ka jingïalehkai.
Ki la kyntu kynpham ruh ïa ki heprit ba kin pyndonkam hok ïa ka sap ba ki don, ban kohnguh sneng, ban long kiba smat ba sting, ban kiar na ki jingmlien ba sniew bad ban long barobor kiba biang por.
La ïoh ruh ka jingkren na ka liang ki kmie kpa kiba la ai ka jingïaroh bad nang ai mynsiem ïa ka Jongksha SC&SC kiba la plie lad plie lynti ïa ki khun jong ki ba kin pyntbit ïalade ha kaba kum kane ka jingïalehkai.
La pynshongshit ha kane ka sngi lyngba da ki jingshad na ki arngut ki coach jong ka Jongksha Grassroots Center. Ki team kiba ïashim bynta ha kane ka sngi kidon baroh 8 tylli.