Wat kynnoh ïa ka KSU, maham ka FKJGP ïa u Gopal Dey
![](https://mawphor.com/wp-content/uploads/2022/05/mawphor-1-1.jpg)
Shillong, Lber, 30: Ka Federation of Khasi Jaiñtia and Garo Peoples (FKJGP) ka la maham jur ïa u Gopal Dey uba kam ïalade ba u dei u General Secretary jong ka Coordination And Welfare Committee na Shella-Bholaganj, ba um dei ban kynnoh ïa ka Khasi Students Union (KSU) halor ka jingshah pynïap jong ki arngut ki barjylla ha ka shnong Ichamati.
“Kane ka kam dei ka jong u hynrei ka dei ka kam jong ki Pulit ban wad ïa ka jingshisha,” ong u kyrwoh ba la phah da u Secretary General ka FKJGP (Seng Kmie) Bah Eldie N. Lyngdoh sha ki lad pathai khubor.
“Ki Pulit haduh mynta kim pat lap mano kita ki briew ba pynïap ïa u dkhot ka KSU u Lurshai Hynniewta ne ïa uta u Pulit ba siat ïap ïa u Bah Cheristerfield Thangkhiew. Ngi kwah ban buh jingkylli ruh shaei u (Gopal Dey) jah une u briew ha ka por ba shah pynïap u Bah Lurshai Hynniewta. Haba mynta u (Gopal Dey) dawa ban kem mardor ïa kita ki briew ba donkti ban pynïap ïa kine ki bar jylla u la dei ban dawa ruh ban kem mardor ïa kito ki riew thrang snam ba pynïap ïa u Bah Lurshai,” ong u kyrwoh na ka FJKGP.
“Kum ka seng ngi maham ruh ba une u Gopal Dey um dei ba ai ding halor ka jingjia ha Ichamati. Lada une u briew u dang ïai bteng ban pynshit, ngi, kum ka seng FKJGP ngin mih paidbah ha ka 7 tarik, Ïaiong ka sngi ba kine ki poiei, hapoh ka shatri ka Meghalaya Linguistic Minority Development Forum ki mut ban shong kyllaiñ myngggor ha Khyndailad,” la ong ka Seng.“Lada ka Sorkar ka sngap ïa ki poiei ki mynder ka mut ka sur ka paid ka Bri u Hynñiewtrei ka la shah taplup noh bad ban pynim biang ngin shim da ki sienjam kiba tyngeh,” la bynrap u kyrwoh.