Ka BJP ka ai jingkyrshan hi ym dei ba khot ka NPP, dei ka jingithuh ïa ki kyrtong NDA : Dr Ampareen

Shillong, Lber 25 : Ka kyrtong jongka NPP na kane ka Shillong Parliamentary Constituency kaba dei ruh ka Myntri Sorkar jylla ka Dr Ampareen Lyngdoh ka la ong ba ka BJP ka wan ai jingkyrshan hi ïa ka NPP ha kane ka election ym dei ba khot ka NPP. Kane ka pynpaw ba ki nongïalam ka BJP na Delhi ki la dep wat jingtip bniah bha shaphang jongki kata ïa I Dr Ampareen bad Agatha Sangma kiba dei ki kyrtong NDA ba ki sa shim ïa kane ka rai ban kyrshan beit ïa ki.
I la ong “ Ka long kaei kaei kaba sngewtynnad ba naduh Delhi ki la ithuh ïa ki kum ki kyrtong ka NDA bad kane ka dei ka rai jong ki nongïalam ba hakhlieh duh ka BJP ha Delhi. Namar na ka liang ka BJP hangne ha Meghalaya ka la phah ïa ki kyrteng jong ki kyrtong kiba pan tiket kata san ngut na kane ka Shillong Parliamentary Constituency bad hynriew ngut na Tura Parliamentary Constituency hynrei ki nongïalam ha Delhi hadien ba ki la bishar bniah bad lehse ioh jingtip kaba bniah shaphang jong ki kum ki kyrtong ka NDA ba ka sa shim ïa kane ka rai ban kyrshan beit ïa baroh arngut ki kyrtong ka NPP”.
“Kane ka pynpaw ruh ba ka saiñ pyrthei ka la ih bha ha kane ka jylla ba ka BJP ka sa shim ïa kane ka rai. Nga sngew ba kane ka long ka jingjop ïa ngi namar kaba kum kane kam pat ju jia ba ka BJP kan ai ka jingithuh ïa ki kyrtong ka NDA ha ka jylla. Baroh shi katta ka BJP ka pynïakhun beit la ki jong ki kyrtong ha man la ka election hynrei mynta lehse ba ki nongïalam ki kwah ba ka NDA kan poi sha ka thong ba la buh ban ïoh synshar biang ba ki sa ai ka jingkyrshan ia ki kyrtong ka NDA ym tang hangne ha Meghalaya hynrei kum ha Nagaland bad ha kiwei kiwei ki jylla ruh”.
“ Kane ka jingshim rai ki nongialam ka BJP na Delhi ka la pynkyndit thret ym tang ïa ki nongïalam bad nongkyrshan ka NPP hynrei wat ïa ki nongïalam bad nongkyrshan ka BJP ruh namar ym shym poi pyrkhat ba kan long kumne. Kane ka jingïoh jingithuh ha ki nongïalam ka BJP na Delhi ka long ruh kum ka jingphah khubor sha ki paidbah lyngba u Myntri Rangbah ka jylla ba ki ruh kin hap ban sngap bad ban pyntreikam ïa kiei ki mat jingdawa ba sahteng na ka bynta ka jylla Meghalaya hadien ba la ïoh ïa ka sorkar kaba khlaiñ ha Delhi” ong biang ka Dr Ampareen.
Halor ki jingkynnoh ba mynta la paw shai ba ka NPP ka dei ka BJP I Dr Ampareen i la ong “ Kito kiba pyrshah bad ki bym thep vote sha ka NPP kin kren bunjait bun skher kin kynnoh beit da kumne kumtai. Phi la ïohi kumno ki jingkynnoh ba laiphewjait phew rukom ki mih ha ki social media. Hynrei nga kwah ban ong ba ym dei ban don jingartatien. Ha nga hi nga sngew ba kane ka jingleh jong ka BJP ka biang namar ha ka jaka ban ïaleh makynti bad duh ei ïa ki seat hangne ha jylla ka bha namar lashai la shisngi ynda ngi la jop bad leit sha Parliament ngi la ïoh lypa ka jingithuh kum kita ki MP na Meghalaya bad kane ka dei namar ka jingstad jong ki nongïalam ka BJP ban shim rai. Kane ka jingleh ka long kum kata ka jingpynithuh lypa ïa ngi sha Delhi” ong biang ka kyrtong ka NPP.
I la pynshai ruh ba in ym leit pynïasoh satia sha ka BJP. “ Namar lada nga kwah ban pynïasoh nga la dei ban pynïasoh naduh ka election MLA 2023 hynrei ngam treh namar nga ïohi ba ki don katto katne ki mat treikam ka BJP kiba long pyrshah ïa ki trai ri trai muluk”.
“ Lada phi kynnoh ba ka NPP ka dei ka BJP nga kwah ban buh ki jingkylli ïa kita kiba kynnoh hato ha u 2023 ha ka election MLA ka BJP ka pynïakhun la ki jong ki kyrtong ne ka kyrshan bad ïatrei lang bad ka NPP. Nalor kata u symbol ka BJP u dei u Lotus bad ka NPP ka dei ka Kot. Ka BJP ka don la ka jong ka Riti Synshar ( Constitution) kaba ïapher bak-ly-bak na ka Riti Synshar ka NPP. Tangba ha kawei pat ka liang ngi ki trai ri trai muluk na kane ka thaiñ shatei lam mihngi ngi donbok ba ka BJP ka dang ithuh ïa ngi bad ka dang theh ki jingïarap ha ki kam pynroi pynpar ruh. Kumta ai kita kiba kynnoh kin ïai kynnoh namar lada ym don kum kine ki jingkynnoh ruh kumno heit kin pynksan nia ha ka election hynrei tang kawei ki paid nongkyrshan kiba kyrshan ïa ngi kin ym sheptieng bad kyiuh bad artatien namar kin ïeng skhem beit ha ka nongrim ban wanrah ka jingjop ba don burom”.
I la ong ba ka HSPDP ruh ka ai ka jingkyrshan ïa ka UDP bad ïakhun pyrshah ïa ka NPP kane kam mut ba ka HSPDP ka la duh bad don sa tang ka UDP. Ki don ha kajuh ka shatri ka RDA bad kane kam mut ba ka HSPDP kam don shuh. Nalor kata tang namar ba ki ïatrei lang ha kane ka election MP ka mut ba ka sorkar MDA 2 kan pra noh hynrei em namar ka don ka jingïaburom mar kylliang.
I la ong ruh ba ka seng saiñ pyrthei hapoh ka jylla ki dei ban ïoh jinghikai na ki seng saiñ pyrthei na shabar ka jylla. “ Nga tharai kane ka la long ka jinghikai ba la pyni da ki seng saiñ pyrthei na shabar ka jylla kumno ban ïalehkai politik. Namar ban jin da la ïatylli lang ha ka election 2023 bad kiar noh na kaba pharia bad thaw bun ki seng saiñ pyrthei katta la ïoh ïa ka sorkar kaba khlaiñ, kumta phi lah ban ong bad kynnoh kumno kumno ruh kane ka long ka jinghikai nangne shakhmat”.
I la ïathuh ruh ba na ka liang jong i shwa ba ka BJP kan ai jingkyrshan ruh ma i shimet i la dep ïakren bad pan jingkyrshan na ki nongïalam ka BJP, Congress, UDP, HSPDP, KHNAM bad TMC ruh kumjuh. “ Nga la pyrshang lut bad pan ka jingkyrkhu kyrdoh na ki paralok MLA kiba rim ruh nga khlem ap tad haduh ban da pynbna namar na lade shimet nga la pan lypa ka jingkyrshan na baroh”.
“ Nga la ïakynduh ruh ïa ki nongkyrshan ka TMC ha ki katto katne ki constituency bad ki la pynpaw ba kin ai ka jingkryshan ïa nga namar kat haduh mynta ki nongïalam jongki kim ong satia shano kin kyrshan. Kane ka jingpan jingkyrshan jong nga kam mut ba ka NPP ka dei ruh ka TMC hynrei nga kwah ba baroh la ki dei na kano kano ka party ruh kin wan ban kyrshan ïa nga kum ka kyrtong jongka NPP ban ïoh ïa ka jingjop don burom”.