Ko RDA lada phi dei shisha ka Seng Riewlum, weng noh na ka jingïakhun: Ardent
![](https://mawphor.com/wp-content/uploads/2024/03/ardent.jpg)
Shillong, Lber 25: Hapdeng ka jingrisa jong ki hajar ngut ki paidbah ha ka jingialang ha ka Voice of the People Party(VPP) ha Mawkriah u President ka Voice of the People Party u Bah Ardent Basaiawmoit, u la kob ia ka Regional Party Alliance(RDA) ba lada ka dei shisha ka seng saiñ pyrthei riewlum ba nylla ba ka dei ban weng noh na ka lympung iakhun MP na Shillong Parliamentary Constituency namar u paidbah u la phai khmat sha ka VPP.
Haba kren ha ka jingïalang paidbah hapdeng ki hajar ngut ki paidbah ha ka jingïalap elekshon ha Mawkriah u Bah Ardent u la ong ba ka kumba long mynta ka rai ka BJP ban kyrshan ïa ka NPP ha ka elekshon MP ka la dei ka jubab kaba shai kdar ba ka NPP ka dei tang ka bula ka BJP ha ka jylla.“”Kaei kaba ka BJP ka rai ka pynshisha ba ka jingong jong ngi ba ka NPP ka dei tang ka snieh langbrot jong ka BJP ka la shai kdar mynta”, u la ong.“U Bah Ardent u la ong ruh ba kumba long mynta lada ïaid sha baroh kawei ka ri Khasi-Jaintia u paidbah uba bun hi u la rai ban kyrshan ïa ka VPP ha ka elekshon MP “bad ngi kwah ba ong ong ko RDA lada phi dei shisha kita ki seng riewlum ba nylla ka jylla weng noh na ka jingïakhun MP hynrei kyrshan noh ïa ka VPP namar u paidbah uba bun u la rai kumta hynrei lada phim leh kumta kane ruh kan paw shai ba phi dei tang ka bula ka BJP bad NPP,” ong u Bah Ardent.
U la ong ruh ba ka jingïatreilang ka UDP bad HSPDP bad NPP ha ka MDA ka long ka mat kaba u paidbah u hap ban buh jingkylli, “namar ha ka sorkar phi ïa bang eh ban ïatreilang hynrei tang shu wan ka elekshon phi la leit ban kynthoh mar kylliang bad kane hi ka dei tang ka jingpyrshang ban pynbieit ïa u paidbah”, u la bynrap.“Haba kren sa ha kawei pat ka jingïalang ïalap elekshon ha Tyrsad u Bah Ardent u la ther kylla ïa u Bah Prestone uba la ong ba ka TMC ka la rai bad kyrshan ïa ka VPP ha kane ka elekshon MP, “mynno ka TMC ka rai ban kyrshan ïa ka VPP ko Maduh Prestone hynrei to tip ba ka TMC na Nongthymmai ba la mihkhmat da u MLA ba dei ruh u President ka TMC ha Meghalaya ka la rai ban kyrshan ïa ka NPP bad sngewbha kum u riewrangbah shuwa ban kren da wad jingtip ym ban shu padiah katba shem,” u la ai jingmut ïa u Bah Prestone.
Haba kren ban pan jingkyrshan na u paidbah u kyrtong MP ka VPP u Dr Ricky AJ Syngkon u la ong ba kumba u la ju kren naduh ka sngi kaba sdang hi ka rai ban rung sha ka jylli ka saiñ hima sima ka daw ka dei namar ka jingsngewkhia ïa ka long ka man ha ka jylla, “Phin peit ïa ka ïohkam ïohjam ne ka koit ka khiah ne ka pule puthi bad ha jan baroh ki liang ngi bat beit ïa ki kyrdan kiba sha trai eh ha ka ri bad lada ngi wad ïa ki daw tynrai phin shem ba ka dei beit na ka synshar khadar na kata ka daw ban weng ïa kane phi donkam ban ai ka jingshaniah kaba skem ha ngi ka party namar ym tang ba ngi don ïa ka thong hynrei ngi don ruh ka jingïohi jngai na bynta ka laiphew bad ki sawphew snem ban wan jong ka jylla namar ka ri kaba ym don ïa ka jingïohi jngai ka dei ka ri kaban sa jah rngai”.
U la ong ba lada ki paidbah kin aiti ïa ka jingshaniah ha ka VPP kan ïalam ha ka lynti kaba don ka jingkyrmen ïa ki longdien.