“Wat die ïa ka vote namar phi die ïa ka pateng ban wan” : Pan jingkyrshan u Bah Peter Shallam na ki paidbah

Shillong, Lber 25 : U Bah Peter Shallam uwei na ki kyrtong khlem seng lane independent ban ïakhun ïa ka elekshon MP Lok Sabha na Shillong Parliamentary Seat, u la kyntu ïaki paidbah ba kin jied bad ailad ïa u ban long kum u MP khnang ba un ïoh ïasaid na ka bynta ki jingeh jong ka Jaitbynriew hapoh Parliament.
U Bah Peter Shallam haba ïakren bad u Mawphor ha ka ïing sah ka jong u kaba don ha Laitkor Nongdaneng da kaba pan jingkyrshan na ki paidbah, u la kyntu ïa ki paidbah ba kim dei ban die ïa ka vote jong ki lane ka vote jong ki kan shah thied noh namar ka long kumba ki die ïa ka pateng ban wan.”Kum uwei na ki kyrtong ban ïakhun ïa kane ka elekshon Lok Sabha nga da kyntu jur ïa phi ki paidbah ba phim dei ban die ïa ka vote jong phi namar lada phi la die ïa ka vote kamut phi die ïa ka pateng ban wan. Pyndonkam hok ïa ka vote jong phi kumba ka riti synshar ka la aibor haphi,” ong u Bah Peter.
U Bah Peter u la ong ruh ba lada ki paidbah ki la ngop ha ka jingshah pynbiej lyngba da ka pisa, uno uno u kyrtong uba jop un ym lah shuh ban ai ka jingshakri kaba khuid ba suba. “Lada phi pyndonkam hok ïa ka, phin ïoh ïa ki nongsynshar kiba hok kiba khuid hynrei lada phi la die noh ïa ka vote ba kordor, lada u ne ka briew ki jop kin ym lah shuh ban ai ka jingshakri kaba khuid ba suba bad phin ym lah shuh ban kren eiei hynrei tang ki jingbabe.”
U Bah Peter u la kynthoh ruh ïa ki seng saiñ pyrthei kiba pher bapher kiba leit sha u paidbah ban ïalap elekshon da kaba ïakawang ktieh para ma ki. “Kam dei shuh ka juk lane ka por ban ïakawang ktieh namar u paidbah hi u la kham stad ïano ban jied, hynrei kum ki nongmihkhmat ki la dei ban wanrah ïa ki jingïakren ban tei ïa ka ri bad ka Jaitbynriew ym ban ïakawang ktieh.
“Ki mat kiba u Bah Peter Shallam un ïakren hapoh Dorbar Parliament lada ki paidbah ki jied ïa u kum u MP, ki kynthup naduh ka jingdawa pyntreikam ïa ka ILP, ka jingpynrung ïa ka ktien Khasi hapoh ka khyrnit kaba phra, ka jingïapynbeit pud, ban wanrah ïa ka roi ka par, ban dawa pyntreikam ïa ki policy tih maw tih shyiap katkum ka juk stad science nalor kiwei kiwei ki mat.
U Bah Peter Shallam uba dei ruh u nongsaid aiñ, u la dep ban thep kyrteng ïalade ha u Returning Officer ha ophis DC EKH myn ha ka 22 tarik Lber bad jied ïa ka shap jong u Mawlynnai na ka bynta ban ïakhun ïa ka elekshon MP kaban sa long ha ka 19 tarik Ïaiong 2024.