Shillong, Lber 24: Ka jingïalehkai ka lympung Shilong Cricket League kyrdan Super Division 2024 hapdeng ka Rangkynsai CC bad ka Spartan CC hynne ka sngi ka la jam sha kaba kut ha kaba ka Rangkynsai CC ka la jop kput palat da spah ron.
Haba sdang, ka toss ka la hap ha ka liang jong ka Spartan CC kaba la jied ban bol nyngkong. Haba shimti ban tied nyngkong ka Rangkynsai CC ka la lah ban kynjoh haduh 272 ron shuwa ba baroh 10 ngut kin shah pynhap hadien 42.3 over.
Ki rangtied kiba la seisoh ha kane ka inning ki long u Kishan Lyngdoh u ba la kamai 62 ron na ki 47 bol, nangta u Savian Blah u ba la kamai 57 ron naki 35 bol.
Haba phai pat sha ki rangkawangbol ka Spartan CC, u Ankit Yadav u la ïoh ban pyndep 7.3 over, shah tied 50 ron bad ïoh pynhap 4 wicket, katba u Mani Bhusan Thakur u la ïoh bynta 9 over, shah tied 43 ron bad khur 3 wicket.
Haba pyrshang ban beh ïa katei ka ron ba la buh ka Spartan CC ka la ïohlad ban tied tang 137 ron namar ba baroh 10 ngut ki la shah pynhap noh hadien 32.1 over.
Napdeng ki rangtied kiba la kamai bun ron ïa ka kynhun ki long u Dipankar Barua (75 ron naki 79 bol) bad u Gagandeep Singh (14 ron naki 35 bol) hynrei kane kam shym la biang ban pyllait ïa ka kynhun naka namrem.
Haba phai pat sha ki rangkawangbol ka Rangkynsai CC, u Ram Gurung u la ïoh ban khur 3 wicket na ki 9 over bad shah tied tang 35, nangta u Ajay Duhan u la khur 2 wicket naki 6 over bad shah tied tang 19 ron.
Ka Rangkynsai CC ka la jop ïa ka jingïakhun da 135 ron bad ïa ka nam Player of the match la khur da u Savian Blah u ba la tied 57 ron bad khur 1 wicket ha ka bol.
