Shillong, Lber 24: Na ka liang jong ka Meghalaya State Olympic Association (MSOA) lyngba ka kyrwoh na u President ka synjuk, ka la ai khublei ïa baroh ki nongïashimbynta ba la mihkhmat ïa ka Meghalaya khamtam ïa ki 55 ngut kiba la khur takma.
“Katba ngi khmihlynti ban lehkai bha ha kane ka 3rd North East Games ka long ruh ka kabu ïa ngi ba ngin bteng ban hikai ïalade lyngba kine ki jingïakhun kiba ngi ïakynduh ha ka ban pynkhreh ban poi sha ka thong.” ong ka MSOA.
Ngin khmih bad bishar bñiah ha baroh 14 tylli ki synjuk ïalehkai ban ïakren ha kaba ïadei bad ki jingpynkhreh bad ki mat ban kyntiew ïa ka jylla ha ka ban khur takma. Ngin sa donkam ban noh khambun ki jingïarap sha ki Association na bynta ban kyntiew ïa ki program bapher bapher bad ruh na bynta ka jingpynkhreh ïa ki kynhun khnang ba kin ïoh ka jingkilanmet bad ruh ki jinghikai kiba biang.
Ka MSOA ka la pynpaw ba bun na ki Athlete ba kynsai ka jylla ki la duh ban leit mihkhmat sha ka North East Games 2024 namar ka jingïatyngkhuh bad ki exam bad kiwei pat ki kam.
