Shillong, Jymmang 23 : Ka Sorkar Jylla kala dep ban siew haduh T. 250 klur ka pisa na ka jingpyntreikam ïa ka skhim Meghalaya Health Insurance Scheme (MHIS), ba pynïoh ïa ka jingsumar khlem donkam ban siew pisa ïa ki paid nongpang jong ka Jylla.
“Ngi la dep siew pynkhuid haduh T. 250 klur na ka Insurance Sheme hapoh ka Jylla bad haduh 4 lak tylli ki Long ïing kila ïoh jingmyntoi na kane ka skhim ka Jylla” ong u Sampath Kumar, Principal Secretary ka Tnad ka Koit ka Khiah haba ïakren bad ki lad pathai khubor shabar jong ka jingïalang North East Regional Review Meeting bala pyn long da ka National Health Authority ha Nongbah Shillong.
Kat kum ka jingong jong u, haduh 175 tylli ki Hospital kila pyntreikam ïa ka Insurance Scheme jong ka Jylla kaba don ïa kumba 2000 tylli ki song ai jingsumar. U ïathuh ba kane ka skhim kala kdup mynta ïa kumba 60% na ki Nongshongshnong ka Jylla kiba ïoh haduh T5 lak kawei ka Longïing ban phah sumar ei haba ïohpang.
Haba kylli, une u Heh Ophisar ka Jylla u pyntip ba ka Sorkar Jylla kala wanrah thymmai mynta sa ïa kawei ka song ai jingsumar (New Health Benefits) ka ban sa treikam noh tang ha kine ki shibnai arbnai ban wan, ban nang kyn thup shuh shuh ïa jingpang haba leit shah sumar.
Halor ki jingeh ba ka Jylla ka mad na ka jingpyntreikam ïa kane ka Insurance scheme, u Sampath ula ong ba kawei ka jingeh ha kylleng ki jaka jong ka Jylla ka dei ka lad pyniasoh (connectivity) khamtam ha ki jaka nongkyndong.
“Ka jingpynrung kyrteng ïa ki paidbah ha ka Insurance Scheme ka dei kaba leh online bad ngi leh ïa kane khnang ba kan nym don ka jingleh thok. Hynrei ka jingbym biang ki lad pyniasoh (connectivity) kala buh jingeh bha” ula ong.
Halor ki jingud jingnam ba ka MHIS kam siew lut ïa baroh ki jinglut jingsep haba shah sumar ha ki Hospital, u Sampth ula ong ba kane ka skhim ka don da ka song kata ïa ki briew na wan na ki longïing baduk, ki Hospital ki ju khmih bad pyllait ïa ka jingsiew katba ïa kibym dei na ki longïing ba duk, ki don da ki song ba ki hap ban siew.
U Chief Executive Officer ka National Health Authority Dr. R.S. Sharma, ula pynpaw ïa ka jingsngew hun halor ka jinglah pyntreikam thikna jong ka Jylla Meghalaya ïa ka Insurance scheme (MHIS) kaba la bynrap lang bad ka Ayushman Bharat Pradhan Mantri Jan Ayogya Yojana.
“Ka Persentage ba la pyni ka pyni ba ka skhim ka long kaba jop ha Meghalaya khamtam haba ka Jylla ka don ïa ki Ophisar kiba da kut jingmut ban pynthikna ba baroh kiba don hok ban ïoh ïa ka skhim kim dei ban duh ïa ki jing sumar haba ki pang ki shitom” ula ong.
“Ngim kwah ba ki briew kin ïoh pang hynrei ngi kwah ba baroh kiba ïoh pang ki dei ban ïoh ïa ki jingsumar” ong u Dr Mishra.
Une u Khliehduh ka National Health Authority ula iaroh ruh ïa ka Jylla Meghalaya halor ka jingthaw ïa ki Village Health Council (VHC) ha ki Shnong ki thaw bad ong “Ki VHC ki dei kiba donkam namar ki dei ki Frontliner kiba hakhmat eh ban khmih ïa kino kino ki emergency ne ki jingïohpang ba donkam jingsumar ba kyrkieh ha ki shnong ki thaw”.
“Ka dei ka buit kaba biang palat bad nga sngew ba ngi dei ban pynshlur ïa kiwei kiwei ki Jylla ba kin bud nuksa. Ngi la dep kren ïa ki 7 tylli ki Jylla ka thaiñ Shatei Lam Mihngi ba kin pyntreikam lang ïa ka buit jong ka Jylla Meghalaya” ula ong.
Ka North East Regional Review Meeting kala sdang hynne ka sngi ha State Convention Centre ban iatai halor ka jingpyntreikam ïa ki flagship programme ka Sorkar Pdeng ba kynthup ïa ka Ayushman Bharat Pradhan Mantri Jan Arogya Yojana bad ka Ayushman Bharat Digital Mission ba dang shu pyllait paidbah da u Myntri Rangbah duh ka Ri ha u bnai Nalur 2021.
