Jowai, Jymmang 22: U Adviser ka Synjuk ki Waheh Shnong War Jaiñtia Amlarem u ma Kolmen Pohshna haka khubor ba la phah sha u Mawphor ula ong ba ki paidbah ka thaiñ war Jaintia Amlarem Sub Division kila shem jingeh palat ha ka ban pyntrei ïa ka MREGA namar ba ka sorkar ba ïalam da u Conrad K Sangma kum u myntri rangbah bad uba bat ruh ïaka Pla tyngka jong ka jylla la lap ba bun bun snem mynta ka pisa ka la sah teng lut.
Ula pynsngew ha kaba ïadei bad ka jingpyntrei ïa ka MREGA hapoh ka Block Development Amlarem bun bah ki VEC ki lah sah pending lut ki bill kiba pyntrei na ka bynta ki paidbah kiba duk kiba kyrduh khamtam eh na ka liang ki (material) kaba dei ka bai tiar bai tar la sah ym duna ïa ki lai (3) snem eiei bad ki nongtrei kim lah shuh ban siew.
Halor kane ki paidbah kila ïa kynduh shibun ki jingeh khamtam na ka liang ki kam shimet ha kaba shna ïa ki sem blang, sem masi bad sem sniang kala mih ka jinghuri hura hapoh shnong poh thaw namar ki paidbah ki kynnoh beit tang ïa ki nongpyntrei ïa kane ka kam hynrei ki la lap ïa ka jingshisha ba kane baroh ka dei ba ka sorkar kam pat lah ban siew haduh mynta.
La pynsngew ba ka jingeh ka long kaba shitom haduh katta ban pyntrei ïa kane ka skim ha kane ka juk kaba mynta, ym dei kum haka por kaba mynshwa ka ïaid shaid shaid, ula ong ngim tip naei ka daw ba ka sorkar kam pat lah ban pyndep haduh mynta ïa kane ka kam.
Halor kane na ka liang ka sur ki paidbah kila ud la nam sha ki bor ba halor bad khamtam eh ïa u Myntri Rangbah ba un pyrkhat lem bad ïarap ïa kane ka kam ha kine ki sngi bad kumjuh ruh ki paidbah jong ka War Jaiñtia kila shem shitom ha kiba bun ki liang ha kaba ïadei bad ki skim, pension tymmen bad ki skim ïap (accident).
La ïathuh ba ka sorkar la 2 snem tam kam pat siew haduh mynta bad kumjuh ruh na ka liang ki skim bapher bapher ki paidbah khamtam ki Contractor kila ud la nam ba shibun ki jingtrei bala deptrei hynrei ka sorkar ka khlem lah ban pynlait bill ha une u bnai March, kum jong ka JJM (PHE), PWD bad kiwei kiwei ki tnad sorkar.
Ki paidbah kila ud la nam ba ka sorkar MDA bala ïalam da ka NPP ryngkat u Chief Minister ba don burum ba kin ïaleh shitom katba lah ban pyllait ïa kine ki bill kiba ïadei bad ka imlang ka sahlang, ka ïap ka im jong u paidbah lym kumta ki paidbah kim banse ban wad ïa ki lad ki lynti kumno ban ïoh ïa kine ki bill kiba la sah pending la bun bun snem, khamtam hapoh ka Block Amlarem bad ban peit bniah halor ki skim jong ka MREGA ban pyllait noh mynta.
Na ka bynta ki skim pension tymmen bad ban wanrah ruh ïa ka CD Scheme hapoh ka Block Amlarem bad kumjuh ruh ïa ka PMAYG ban pynïoh kloi hapoh ka Block Amlarem namar ba la slem ki por bun ki shnong ki bym pat ïoh ïa kane ka skim bad ba dang bun eh ki shnong kiba duk ba kyrduh ba donkam ban ïoh jingïarap ban shna ïing ba duk lyngba kane ka skim.
