Nongstoiñ, Lber 06: Na ka bynta ban pyllait ïa ka jingdheng kali ha sor Nongstoiñ, ki ophisar ka tnad pulit ba pynïaid ïa ka ïaid ka ïeng ki kali ha West Khasi Hills, ha ka sngi balang ka 6 tarik Lber ki la leit ban pynshai ia ki nongñiah kali kamai na Nongstoiñ sha Shillong, ba naduh lashai ka sngi palei ka 7 tarik Lber 2024, baroh ki nongñiah kali kamai kata naduh ki Alto tourist taxi, TaTa Sumo, Ertiga, Mahindra bad kiwei kiwei kiba wan kit ïa ki nongleit nongwan na Shillong sha Nongstoiñ, ki dei ban pynhap beit ha Madiwat parking lot bad ym shah shuh ban dang wan pynhiar ïa ki sha pdeng sor.
La pynbeit ruh da ka por ba yn shah ban wan pynhiar ïa ki nongleit nongwan hapdeng sor tang naduh ha por 5 baje janmiet shaneng. Ha kajuh ka por la pynbeit ruh ba ïa ki kali Tourist baroh ba thep ïa ki nongleit nongwan napdeng sor Nongstoiñ ha ka por mynstep yn shah tang haduh 7.30. Lait nangta baroh ki kali kiba kiew sha Shillong ki dei ban thep ïa ki nongleit nongwan na Mandiwat parking lot.
