Shillong, Jymmang 20: Ka seng Federation of Khasi Jaiñtia & Garo People (FKJGP)-Mawlai Circle kala dawa ïa ka Sorkar Jylla ba ka dei ban thung beit da ka jingtohkit bad banpynshitom ïa ki briew ba donkti halor ka jingtrei torti ïa ka Inter State Bus Terminus (ISBT) ha Mawlai Mawiong ban pynthikna ba kum kine ki jingjia kin ym jia shuh ïa ki project ban dang wan ha Jylla.
“Ngi dawa jur ba ka Sorkar MDA ka dei ban thung beit da ka jingtohkit bad ban pynshitom ïa ki briew kiba donkti. Ngim pdiang satia ïa ka jingkren u Symbud Myntri Rangbah ka Jylla ba ong ba ym donkam ban tohkit hynrei ba dei ban shna biang lane maramot ïa ka” ong u Bah Khrawkupar Nongsiej, President ka FKJGP Mawlai Circle.
Haba pynrem ïa ka jingkren u Symbud Myntri Rangbah, u Bah Khrawkupar ula ong “Ka sorkar ka ju ud na ka por sha ka por ba ka kyrduh pisa haba phai sha ka tulop ki Nonghikai hynrei ka ïoh pisa nangno pat ban phah shna biang ne maramot ïa ka ISBT”.
“Ka ISBT ka dei ka project kaba heh kaba la bei tyngka da ka Sorkar Pdeng haduh T. 48 klur. Sa katno klur ka Sorkar Jylla kan pynlut ban maramot ïa kane ka jingtei kaba dang shu dep plie dang ha ki khyndiat bnai” ula bynrap.
Une u Nongïalam ka FKJGP ula ong “Kane ka pyni shai kdar ba na ka liang ka Sorkar ka donkti lang ha ka bam sap na kane ka jingtei”.
Ha kajuh ka por, ka FKJGP kala buh jingkylli ïa ka Sorkar Jylla ba mano ba pyntrei (Contractor) lane kaei ka Kompani kaba pyntrei ïa ka ISBT.
U Bah Khrawkupar ula pynpaw ïa ka jingkyndit ban ïohi ba u Symbud Myntri Rangbah ula kren shai ba dei ban pynshitom ïa ki Ophisar ba khmih ïa ka project ym ïa u Contractor.
“Balei ba ka sorkar ka iada ïa u Contractor ne ka Kompani?. Haba pynshitom hi, dei ban pynshitom lang bad Ophisar bad Contractor” ula ong.
“Kum ka seng ngu sngewkmen ba ki don kum kine ki project kiba heh ha Jylla ki ban ai jingmyntoi ïa u paidbah hynrei ngi sngewsih pat lada don ka jingpyntreikam bym hok namar ka dei ka jingduhnong u paidbah” ula pynkut.
