Haduh 8 tylli ki shithi la phah ka sorkar jylla sha Delhi ban ïoh jingithuh noh ka Ktien Khasi bad Garo
![](https://mawphor.com/wp-content/uploads/2024/02/DSC03618a.jpg)
Shillong, Rymphang 19 : U Myntri Rangbah, u Conrad K Sangma mynta ka sngi, ula ïathuh ha ïingdorbar thaw aiñ ba ka Sorkar kala buddien khlem shongthait bad ka Sorkar Pdeng na ka bynta pynrung noh ïa ka ktien Khasi bad Garo ha ka khyrnit ba phra jong ka Riti Synshar ka Ri India.
“Haduh phra tylli ki shithi ngi la phah sha ka sorkar pdeng ba kan mynjur ban pynrung noh ïa ka ktien Khasi bad Garo ha ka Khyrnit kaba phra jong ka riti synshar ka ri India”, la ong u Conrad, hab ajubab ïa ka jingkylli ba la wanrah da u MLA ka VPP na Mawryngkneng, u Bah HS Kharpran.
U Myntri Rangbah u la ïathuh ruh ba kam don kano kano ka kyndon ne ka jingbuh kyndon ban ithuh ïa kano kano ka ktien ha ka Khyrnit kaba phra. U la ïathuh ruh ba kam shym la don ka jingpynshai ne ka jingbatai bniah kaba wan na ka Sorkar India halor ki daw ba slem ban pynrung a kine ki artylli ki ktien ha ka khyrnit ba phra.
Wat la katta ruh, u la ïathuh ba ka sorkar kan dang iai buddien ïa kane ka kam bad ka Sorkar pdeng bad kan ym shongthait tad haduh ba kine ki artylli ki ktien kin ïoh rung ha ka riti synshar jong ka ri.
Haba pynpaw ba ka dei ka Sorkar MDA-I, kaba la shim ïa ka sienjam ban mynjur ïa ka resolution ha u Nohprah 2018 bad ong, “Kane ka dei naduh kaba sdang naduh ka samoi treikam jong ngi bad ka pyni ïa ka jingkut jingmut bad ka jingkitkhia ban lah pynrung noh ïa ka ktien Khasi bad Garo ha ka khyrnit ba phra”, la ong u Conrad.
Nalor kane, u Myntri Rangbah ula ong ba ka ktien Khasi bad Garo ki dei napdeng ka thup jong ki 38 tylli ki ktien kiba dang sahkut bad ka MHA, haba jubab ïa ka jingkylli jong u MLA ka Congress na Mawhati Bah Charles Marngar uba la ong ba hato ka jingpynslem ka MHA ban shim rai ka dei namar ka daw ba ka Sorkar kala phah ïa ka jingtyrwa ha kajuh ka por ban pynrung lang ïa ka ktien Khasi bad Garo.
U Bah Charles ula ai nuksa ba ka Sorkar Pdeng ha u 2003 kala ai jingithuh tang ïa ka ktien Bodo watla ka Sorkar Assam kala phah ïa ka jingtyrwa ban pynrung lang ïa ka ktien Karbi”.