Shillong, Rymphang, 18: Tang hadien katto katne ki sngi ba ki bor pynïaid distrik ki la pynlong ïa ka wah Umkhrah hynrei na ka liang ki paidbah kim patiaw satia ïa kane kwah jong ki bor pynïaid ban leh khuid bad sumar ïa ka mariang.U nongthoh khubor uba la ïoh ban leit jngoh ïa ki thaiñ jong ka Polo Shillong u la lap ba ka la don kawei ka nala kaba don mar syndah bad ka ktem sah ki Pulit CRPF kaba satah da ki ñuit ki ñier suda bad dap ruh da ki kot ki byrni plastic bad ki synduk kot bad synduk dohkha.
Kane ka nala ka dei ruh kaba la dang shna hynrei kaba la dap da ka ahor jaboh kaba sma iwtung kaba la pyndap ïa kane ka Nala. Ka nala ka dei ruh kaba don ha syndah jong kiba shong dukan halor ka slab jong ka.La ïohi ruh ba ka jingïabret jaboh pathar ha kane ka Nala ka la long shaba palat haduh ba kane ka Nala ka la dap da ka ñuit kaba la bret bad pyntuid hapoh ka Nala.
Kumta ladei ïa ki bor Sorkar ban jurip bad maham ne mana ïa ki briew ne wat ïa kiba ju shong dukan ha katei ka jaka kaba ki ju khot ka ïew ki jaitbynriew Garo ba kin long kiba sumar na ka jingbret pathar ïa ki jaboh jabaiñ. Ka la dei ruh ïa ki bor ba halor kum na ka Shillong Municipal Board ne na ka tnat Urban Affairs ban shu tap beit noh ïa katei ka Nala khnang ba kiba ju mlien ban bret ñuit shapoh Nala bad kiba la tuid pat sha ka Wah Umkhrah kin ym ïohlad shuh ban leh ïa kum kitei ki kam bym pyrkhat ïa ki jingkhuid ka wah bad ka mariang.
