K a Mei Mariang ka long kum ka Kmie bad ma ngi ki khun bynriew ngi long kum ki khun kiba ngi im ngi sah ha ka jingkdup jong ka kmie kaba long ka Mei Mariang. Ka jingkylli hangne ka mih hato mano ba ju kynmaw ba ma ngi ki khun khlem ka Kmie ngin nym lah ban im ban sah ha kane ka pyrthei. Ka jingpynjot pynpra ïa ka Mei Mariang da kaba lute bad pynjot pathar khlem da don shuh ka jingthew jingwoh, ka la long hi thik kumba ngi thmu ban pynïap ïa la ki kmie ki kpa. Mano ba hun ban shim ïa la ka jingim jong ki kmie ki kpa kiba la sumar sukher bad ban ri ban dkup ïa ngi naduh ba la kha sha ka pyrthei. Ka jubab kaba mih hangne ka long ba ym don mano mano ruh ba nud ban pynïap ïa la ka jong ka kmie ne u Kpa, namar ngi ieit ngi thoin ïa ki ba ki la sumar la sukher bad la ai bam ai dih ïa ngi naduh dang kha bad haduh ba la heh la san.
Kiba nud ban pynïap ïa la ka jong ki kmie ki kpa, ki la dei sa tang ki runar kiba ym don shuh ka jingïatip lem ïa la ka jong ki kmie ki kpa kiba la sumar sukher ïa ki ban ai jingim. Ka jingpynjot pathar ïa ka mei mariang ruh ka long kum ba ngi la shukor ïa lade, namar dei ka mei mariang kaba ai jingim bad kaba ri ba sumar ïa ngi hapneh jong ka.
Ka jingpynjot pathar ïa ka mei mariang ka don bun jait, ka jingleit lute ïa ki mar poh khyndew, ka jingpynïap ïa ki mrad ki mreng, ki dohum dohwah bad ka jingpom pathar ïa ki dieng ki siej ka jingtih maw bad shyiap bad ter ter. Kane ka jingleh runar jong ngi klem da don jingthew jingwoh ïa ka pateng ban sa wan ka la buh ha tmier jong ki riat bah, ha kaba lada ngim don ïa kata ka jingkitkhlieh kan poi ka por ba ka mei mariang ka lyngkhuit bad kan nym lah shuh ban kdup bad ban ai jingim ïa ngi.
Sngew pangnud ban ïohi ïa ka jingpom pathar ïa ki dieng ki siej ha ki khlaw ki btap, ka jingpynjaboh ïa ka mei mariang da ki rukom ba lai phew jait, ka jingpynïap ïa ki dohum dohwah da kaba wieh dawai bih. Lada kane kan ïaid bteng hato ngi ju pyrkhat neem kaei ka ban jia ha ka pateng ban sa wan ki khun ki kti.
Ka jingma kaba khraw tam ha kine ki sngi kam dei satia kata ka jingïapynïap ka jingïatuh ïa thiem bad ka jingïakynad kawei ka ri bad ka wei ka ri. Hynrei ka jingma kaba hap hakhmat duh ka dei ka jingpynjot ïa ka mei mariang namar shisien ba ka mei mariang ka la jot kum ki khun bynriew kiba im hapneh jong ka ruh kin nym ïoh shuh ka jingim.
Kiba bun ki ri ha ka pyrthei ki la kyndit thiah ban sumar ïa ka mariang da kaba thung shibun ki dieng bad ban sangeh ïa ka jingpynjot pathar ïa ka mariang, namar ki sngewthuh ba lada khlem ka mariang, u khun bynriew ruh un nym don jingim. Ki don ruh ki shnong kiba la kylla duriaw namar ka jingkhluit jong ka mariang, ka la pynum ruh ïaki thah ha ki lum ban ban tuid sha ki shnong ki thaw haduh ba bun ki la kylla nongphet wir.
Kumba long haduh mynta, haka jylla Meghalaya kiba bun na ki paidbah kim pat sngewthuh ïa ka jingma kaba ap na ka jingpynjot ïa ka mariang. Hynrei ki dak ki shin ki la sdang ban paw, hakaba lah ruh ban ong ba bun ki shnong ha ka jylal ki la sdang ban syrtok wat ïa ka umbam ka umdih, namar kiba bun ki tyllong um ki la sdang ban rngad ka daw kaba hakhmat eh ka paw ka dei ka jingpynjot pathar ïa ka mariang da kaba pom pathar ïa ki dieng ki siej, khlem da thung bujli shuh shuh n ka bynta ka pateng ban sa wan.
Lah ruh ban ong ba wat ka sorkar kmie ka la shim khia kumno ban ïada ïa ka mariang, ha kaba ka sorkar ka la buh ruh ïa ka prokram ba kyrpang ba la tip kum ka Clean and Green Mission. Kane ka jingpynmih ïakane ka prokram ruh ka dei halor ka jingma kaba ap na ka daw ka jingbret pathar ïa ki jaboh jabaiñ, ka jingpynjot pathar ïa ka mariang, ha kaba lah ban ong lada kum ki nongshong shong kim kyndit bynriew kan poi ka por ba ka nemsniew kan sa wan haduh ba u khun bynriew un nym don jaka shuh ban im, namar ka daw kaba tynrai ka dei ka jingpynjot ïa ka mei mariang kaba long ka nongri nongda bad kaba long ruh ka nongai bam ai sa ïa ngi ki khun bynriew.
Ban ïada ïa ka mairang wat mut ruh ba lah ban leh tang da ka sorkar, ha kaba ha ka jingmut jongngi ka dei tang ka sorkar kaba hap ban sumar sukher ïa ka mariang, hynrei ngi klet pat ba mangi hi ki paidah ngi long kita ki sorkar ban don ïa ka jigkitkhlieh ban ïada ïa ka mariang.
Ban ïada ïa ka mariang, ka la dei ka por ba man la uwei pa uwei u nongshong shnong ka jylla u dei ban don ïa ka jingkitkhlieh. Kum ki nongshong shnong kiba la rung ka jingnang jingstad, ngi la dei ruh ban buh ïa ka jingkylli ïa lade. Ba ngim donkam shuh ban shaniah ha kiwei ban ïada ïa ka Mariang, hynrei da lade ngi dei ban ïada ïa ka mariang da kaba ngi khang pyrshah ïa ka jingpom pathar ïa ki khlaw ki btap, ka jingpynïap ïa ki mrad ki mreng bad ka jingpynïap ïa ki dohum dohwah kiba don ha pneh ka mei mariang. Ka jubab ruh ka mih hangne, ban ïada ïa ka mariang la donkam ban don ka jingïatylli ha baroh ki liang, kata naduh ka sorkar, ki nongshong shnong, ki ophisar bad ki seng bhalang.
Lada ngi k wah ban dang ïoh ïa ka jingim ha ka pateng ban sa wan to mih noh ban shim ïa ka jignkitkhlieh ban ïada ïa ka maraing bad nai ap shuh haduh bala dier ka por, namar kam myntoi ba ngin ïam ngin ud haba ka dud ka la hoit ha madan bad shuwa ba ka mariang kan jot bad kan shah ktah na ka jingrunar u khun bynriew, ka la dei ka por ba ngin ïa ong lang to ngin ïeng ban ïada ïa ka Mei Mariang, namar ka Mei Mariang ka dei kaba ai jingim ïa ngi.
