Khliehriat, Rymphang, 16: Ka Khasi Students Union East Jaiñtia Hills District, hynnin ka sngi ka la leit mih sha ka ophis NHIDCL Shillong bad kane ka jingleit ka seng ka dei namar ba ka kaiphot ba la ioh na katei ka ophis kam pat biang pura bad kam ai jinghun satia ïa ka seng ha kaba iadei bad ka jingshna ïa ka surok National Highway ha East Jaiñtia Hills District.
Kum ban shu pynkynmaw ka KSU East Jaiñtia Hills District ka la pan da ka RTI na ka ophis NHIDCL, RTI reg. no. NHIDCL. /R(E/24 /A0008 dated 12.1.2024) halor u surok Four Lane, halor ka jingbym hun ïa ka kaiphot ka seng ka la appeal biang pat ïa ka RTI kaba don ïa reference number _First appeal reg.no . NHIDCL/A/E/24/0004 dated 22.1.2024_ sha ki bor ba halor jong kane ka tnat sorkar, la ong ba halor kane na ka liang u Appellate Authority lyngba ka shithi No.NHIDCL/RO- SHG/2021/17/4465 dated. 8.2.2024 la khot iakren ïa ki arliang mamla kata na ka seng bad u CPIO ka NHIDCL.
“Haba iakren halor ka jingbym hun halor ka jubab lyngba ka RTI na ka liang u CPIO u la iathuh ba haduh mynta ka project jong ka four lane ha East Jaiñtia hills district ka dang shu sdang bad kim pat lah satia ban ai ïa ka jubab kaba pura khlem pat mynjur ïa ka da ka DPR (Detail project report) jong ka project, hynrei u la jubab ba ka survey ka dang iaid beit hi lada ym don kano kano ka jingthut khamtam ban jied ïaki jaka ban iaid ka surok, shuh shuh na ka liang ka seng ka la ioh jingtip ba ïa ka project ka NHIDCL ka thmu ban iaid beit na ki lum( Greenfield) khnang ba ka jingpyntrei ïa ka surok kan nym jynjar bad ba ka surok ka long kaba beit. Ka seng la ioh jingtip ruh ba katkum ka project plan yn don kumba 2 tylli ki tunnel ki ban kynjoh ïa ka 6 km kawei ka tunnel bad shibun tylli ki jingkieng ki ban jrong 100 meter sha jrong, la iathuh na ka liang ka NHIDCL ba kane ka project kan dei kawei ka ban pynsuk ïa ki paidbah bad kan shim por hi” ong u kyrwoh.
“ Haba kylli pat halor ka jinglut jingsep lane ka estimated budget la ong ba kane ka project kan kot haduh T26 hajar klur tyngka bad ban iaid beit ka kam yn hap ban mynjur da ka high-level committee, ka tnat ba dei peit bad yn hap ioh ruh ïa ka jingmynjur wat na ka cabinet jong ka sorkar pdeng bad lyngba u myntri ka ri. Haba phai pat sha ka Land compensation lane ka jingsiew bai jaka, ka NHIDCL ka la ong ba ïa ka compensation hi yn hap bah khlieh da u DC jong ka district halor kane ka kam bad ka bai lutksan ym pat lah ban kheiñ haduh katno un ai shi Square Ft, ïa ki jaka. Ka seng ka dawa ba la kumno kumno yn hap ban siew ha ka dor kaba ki trai jaka ki mynjur lang. Ka seng kan iai buddien bad kan pyntikna ba kane ka project kan nym sangeh shiteng por hynrei khmih lynti kan iaid beit” pynkut u kyrwoh khubor na ka KSU.
