Shillong, Rymphang, 14: Ka Khasi Students’ Union (KSU) Laban Circle ha ka sngi Balang ka la aiti da ka dorkhas ha ka Deputy Commissioner ka East Khasi Hills Kong RM Kurbah bad aipor 15 sngi ban kyndang ïa ki briew ba sah beaiñ ha Maxwelton Estate.
“Kane ka ishu ka la sahkut tang ha ka miej jingïakren naduh u snem 2022 bad kam shym la don kano kano ka jingpynbeit na ka liang ka Sorkar bad ka ophis Deputy Commissioner ban kyndang ïa ki briew kiba sah beaiñ bad katba nang mih ka por ki briew ki dang jyllei bad dang rung khlieh shuh shuh ki bar jylla,” la ong ka seng ha u kyrwoh.
Ka Seng ka la pynpaw ba ki briew kiba sah beaiñ ha kane ka jaka kaba hap hapoh ka Municipal ki ri masi, ki pyntuid jaboh shapoh ki nala, ki wah bad kane ka ktah lut ïa ka koit ka khiah jong ka shnong ka thaw.
“Ha ki jaka ba hap hapoh ka Municipal ka aiñ kam shah ban ri jingri hynrei ki bor pynïaid ki matlah bad kim shim la leh eiei halor kane ka bynta. Ha kaba ïadei bad kane ka bynta ka seng ka ïakynduh na ka por sha ka por ki bor pynïaid jong ka Shillong Municipal Board (SMB) bad ha ka 5 tarik, Jylliew 2023 ka la buh dorkhas bad maham tyngeh ba ka SMB ka dei ban shimkhia ban kyndang ïa kine ki briew. Na ka liang ka Municipal ki la mynjur ha kato ka por bad ki la phah notis sha ki briew ba sah ha Maxwelton Estate hynrei ka shu kut noh tang ha ka jingdaiñkuna hynrei ka jingïakren ka kylla noh ba ka SMB kam shym don ka bor ban pynmih ïa kine ki briew bad ka Seng ka suba jur ba ka don eiei sha lyndet ba ka kylla ktien ka SMB,” la kynnoh ka seng.
“Kine ki briew ki sah beaiñ ki ïoh ïa ka bording, ka umbam umdih khlem kano kano ka jingsiew. Na ka por sha ka por la ju ïohsngew ruh ba ïa kine ki briew la bei pisa da ki kynhun shitniam jong ki Hindu. Kane ka jaka ka la long ruh kum ka ktem dih drok, kam leh awria, ka tuh ka thiem bad kane ka buh jingma ïa ki nongshong shnong baroh,” la kynnoh shuh shuh ka seng.
“Kaba sngew thamula ka long ba kane ka jaka ka don marjan bad ka Assembly hynrei ki Nongmihkhmat ka jylla ki long kiba matlah bad manla ka por haba ki leit sha Assembly hynrei kim shim lah ban peit bad khmih ïa kane ka jaka. Ka Seng ka kyntu ïa baroh ki Nongmihkhmat ka jylla ba ha ka Dorbar Mang Tyngka ka ban sa long kin sangeh ban hiar bad leit peit bad khmih ïa kane ka jaka kin sa lap ïa ka jingjaboh, ka jingsma iwli ba mih na kane ka jaka,” la ong ka seng.
“Kane kan long ka jingïakynduh kaba khatduh na ka liang ka Seng ban ujor ïa ki bor pynïaid bad lada kim lah ban leh eiei halor kane ka bynta hapoh 15 sngi, ka seng hi kan shim ïa la ka jong ka sienjam. Ka Seng ka kwah ban ïaid da ka lynti ba jaijai ryngkat ki kyndon aiñ hynrei lada ki bor pynïaid ki leh matlah, ka seng kan hap ban shim hi ïa ka aiñ ha la ka kti na bynta ka bha ka miat jong ka jaitbynriew,” la maham ka seng.
