Ka long kaei kaei kaba sngewkmen bad sngewtynnad ban ïoh sngew ïa ka jingshim khia bad pynbna jongka sorkar ban pyntreikam da ka mission ban ai kam aijam ïa ki samla da kaba ïarap ïa ki ban ïeng ha la ki jong ki kjat ym shuh ban shaniah tang ha ki kam sorkar. Hynrei ka jingkylli ka long hato kane ka mission kan ïarap ban weng ïa ka jingeh jong ki samla na ka kyrduh kam kyrduh jam. Hooid lada pyntreikam hok khlem da peit shilliang khmat ne ñiew shilliang khmat ïano ïano ne da kaba ym buh ïa ka lyer politik hakhmat hynrei trei salon sar beit na ka bynta ki khun samla, khlem pep kane ka mission jongka sorkar kan long kaba jop bad kaba wanrah nam lehse ïa ka jylla Meghalaya.
U Myntri Rangbah ka jylla u Conrad K Sangma dang ha kine ki khyndiat sngi ula ïathuh ba ka sorkar jylla ka la pyntreikam da ka Mission ban kyntiew ai kam ïa ki samla da kaba ïarap ïa ki ban seng kam lajong bad ka don ka jingthmu ban bei pisa shwa sha ki 20,000 ngut ki samla ba kin sengkam lyngba ka CM-Elevate.
U la ong ruh ba ka sorkar, ka ngeit ba ka ïoh ka kot jong ka ri, ka jylla kan lah ban ïaid shakhmat lyngba ka jingseng kam lajong bad ki karkhana kiba seng da ki riewshimet
Kumta ka kamram jong ka sorkar ka long ban thaw ïa kata ka rukom treikam, ban pynbiang ïa ki policy, ki lad ai jingïarap bad ki jingtei bapher bad ka rukom treikam ka ban ai mynsiem ïa ki nongseng kam lajong. Ka sorkar ka don ïa ka rukom treikam kaba shai kdar, bad ka ban jur halor ka jingseng kam lajong kum kata ka thong ba hakhmat eh ban thaw bad ban ai ïa ki kam ki jam ha ka jylla..
Ha ka jingïalang jongka Prime kaba la long dang shen ha Polo ha ka jingaiti ïa ki cheque sha ki riewshimet kiba la seng kam lajong bad ki kynhun kiba la shah khmih bniah ban shah jied ban ïoh ïa ka pisa lyngba ka CM-Elevate, u Myntri Rangbah ula ong, “Ngi kwah ban thaw ïa ka kolshor jong ka jingseng kam lajong. Ngi kwah ba ki samla jong ngi kin shim ïa ka kabu khlem ka jingtieng bad ban shim kabu ïa ki lad kiba don hapoh jong ka jylla. Kum ka jylla ngin bteng ban rakhe ïa ka mynsiem jong ka jingseng kam lajong”.
U Myntri Rangbah ula ong ba ka CM-Elevate ka dei ka prokram na ka bynta ki nongseng kam lajong bad ka dei ruh kaba la ïaid shitrhem bha hapoh ka ri bad ka sorkar ka la ai ïa ka lad ïa ki samla ba kin ai ïa kino kino ki jingtyrwa hapoh jong katei ka skhim.
La ïathuh ruh ba ka sorkar kan kyrshan ïa ka jingtyrwa ka ban kot haduh 75 percent ka jingai Subsidy bad ban ai jngïarap ïa ki jingdonkam, rukom pynïaid bad ka jingkyrshan na ki riewshemphang ban pynthikna ba ka kam ka jongki, kan long kaba ïaid beit bad kan seisoh Nalor kane, la pynpaw ruh ba ha ki 3-4 snem ban wan, ka sorkar kan ai jingkyrshan kumba 20,000 tam ki nongseng kam lajong kiba leh ïa ki kam khaïi bapher bapher hapoh ka jylla bad ula ong ruh ba ka sorkar kala mang ban pynlut T.300 Klur lyngba kane ka skhim.
Ka jingthmu kaba ïar jong kane ka skhim, ka long ban pynthikna ba ki samla kin ym shaniah tang ha ki kam sorkar hynrei kin wad ruh ïa kiwei kiwei ki lad ban ïohkam ïohjam bad ka jingkyntiew ïaka jingseng kam lajong kan ïarap ha ka ban aikam aijam ha ki kam kiba pynïaid da ki riewshimet.
Kumta haba phai sha kine ki thong jongka sorkar ka mission ka long da shisha kaba itynnad bad sngewhun hynrei ka shong pat ha ka rukom pyntrei namar kaba sheptieng ka long ba kiba ïoh jingmyntoi kin long tang kito kiba don jingïadei bad kiba don ha ka bor ne shuki katba u rit u ria wat lada u pyrshang ban ïoh jingïarap ruh ym don ba patiaw satia ïa u. Lada ka sorkar ka don ka jingthmu ban weng shisha ïa ka jingeh ki khun samla ka dei ban trei khlem leh shilliang khmat ïano ïano ruh hynrei ban pynim salon sar ïa baroh ki khun samla.
