Nongstoiñ, Rymphang 11: Ka jingtrei shitom bad minot thop jong ki nongrep jong ki shnong kiba don saw dong ka pyntha Umyiap ka la pynjyrngam hi khrek haba peit ha shilynter jong katei ka pyntha. Ki nongrep na katei ka thaiñ kim ju pynlehnoh ei ïa ki jaka rep jong ki bad ha baroh ki saw aiom ki trei ki ktah ban pyndap ïa ka ïing ka sem jong ki.
Ki nongrep ha katei ka thaiñ tang mar shu dep lum ïa u kba na ki pynthor, hadien shitaïew ki la sdang ban puh ban daiñ ïa ki pynthor jong ki na ka bynta ban thung bad ban rep da kiwei pat ki jait jingthung kum ki jhur ki jhep, u phan bad kiwei kiwei. Haba peit ha kine ki sngi ïa ki jaka rep ka itynnad haduh katta katta, namar ïa ki jaka ba ki rep motor ki la sieh da ki dieng kiba rit ban pynpur, hynrei ki jaka ba ki rep da kiwei pat ki jingthung kum u kajor, muli, sohlakum bad kiwei kiwei ki shu jyrngam baroh shilynter.
Haba kylli na ki nongshong shnong katei ka thaiñ, ki la ong ba ka jingpynmih jhur na katei ka pyntha Umyiap ka jur bha ha u bnai Ïaïong bad la jan baroh kawei ka sor Nongstoiñ la pyndap da u jhur la la pynmih da ki nongrep kiba rep ha pyntha Umyiap
Ki nongrep ha katei ka pyntha ki la ong ruh ba ki don ki nongrep kiba trei shitom bad kiba lah ban rep bun ki lah ban kamai da ki lak tang na ka bai die jhur. Nalor kata ki la ong ba naduh Mawkynbat ter ter haduh Mawsngapwir, la jan man kawei pa kawei ka thliew ïing ki dei kiba trei shitom bad kiba minot bha ha ka rep ka riang.
Ki la ong ruh ba lada dei ha ki snem ba kam don ka jingshah ktah na ka jingkylla ka mariang ki nongrep jhur ki ju pynpoi haduh kiwei pat ki ïew ki hat bad haduh sor Shillong ban shalan ïa ki jhur ba bun jait ba ki pymih na ki jaka rep jong ki.
Kum ban pynkynmaw ba ka pyntha Umyiap ka dei ka pyntha rep kaba heh tam ha poh ka jylla kaba long ruh kum ka pliang ja jong palat arphew tylli ki shnong kiba don shaphang mihngi, sepngi, shatei bad shathie jong katei pyntha rep.
