Nongstoiñ, Rymphang 05: Namar ka jingïakynduh jingeh jong ki paitbah ka Mawshynrut constituency ha ka leit ka wan bad ka kit ka bah, u bah Methodius Dkhar wat la ka jingshah jied jong u kum u MLA kam pat kynjoh wat tang shisnem ruh, hynrei u la shimkhia haduh katta katta na ka bynta jong ki paitbah ka constituency baroh kawei.
Utei u nonghmihkhmat ka Mawshynrut haba ïakren bad u nongthoh khubor u la ong ba naduh ka por ba u sdang ban ïalap election, u la kular ha ki paitbah ba un ïaleh katba lah ban wanrah ïa ki kam pynroi kum ki surok, ki madan ïalehkai, ban kyntiew ïa ki lad jingsumar na ka bynta ka koit ka khiah, ka pule puthi bad kiwei kiwei ki kam pynroi kiban wanrah jingmyntoi na na bynta ki paitbah.
U la ong ruh ba haduh mynta u la pyrshang ban pruid dak ïa ki ar tylli ki surok thymmai bad u la dep pynsngew sha ka sorkar bad un sa pynkynmaw biang ha ka dorbar mang tyngka jong une u snem. Kitei ki ar tylli ki surok thymmai kiba u la dep pruid dak ki long kawei na Seiñduli sha Siangra kaba jngai kumba ar haduh lai kilomitar bad kawei pat na Thiepjaphlang shaduh Umshynrut, kaba jngai kumba phra haduh khyndai kilomitar.
Haba kylli haduh lano ka sorkar kan mang pisa na ka bynta ban pyntrei ïa kitei ki surok, utei u nongmihkhmat u la ong ba ym pat lah ban tip namar ba ka sorkar kan dang phah ïa ki briew ban sorbe. Hadien ba ka jingsorbe ka la dep ka sorkar kan sa phah shna ïa ka detail project report (DPR) na ka bynta ban kheiñ ïa ka jinglut jingsep bad kan sa buh ïa ka mangpisa kaba biang shuwa ban khot tender.
Ha kaba ïadei bad kiwei pat ki kam pynroi hapoh ka constituency, u bah Dkhar u la ong ba u don ka jingangnud kaba khraw ban kyntiew ïa ki samla kiba don sap ha ki kam ïalehkai ba bun jait ym tang ha ka phutbol. Hynrei ban kyntiew ruh ïa ki ha ki jingïalehkai kum ka badminton, table tennis, boxing bad kiwei kiwei kiba hap ban ïalehkai hapoh ki hall kiba biang.
Na ka bynta kitei ki jingïalehkai u la dep pynïoh ïa ka skhim na ka bynta ban shna ïa ka indoor stadium ha Mawthengkut bad ynda la dep ban tei ïa katei ka indoor stadium, kan long ka jingmyntoi kaba khraw ïa ki samla kiba don sap ha ki kam ïalehkai ba kin ïoh ban praktis bad ban pyntbit ha ki jingïalehkai ba ki don ïa ka sap.
Ha kaba ïadei bad ka kot ka khiah, ka pule puthi u la ong ba kum u nongmihkhmat un sa phah buddien ïa ka jinglong jingman jong ki jaka sumar kiba la don lypa kum ki CHC, PHC bad ki Sub Health centre. Lada na baroh ki jaka sumar kiba la don lypa ki la donkam ban kyntiew kyrdan, un sa shimkhia ban pynkynmaw ïa ka sorkar man la ka por ba kan shimkhia ban ba kan pyntreikam katkum ka jingdonkam jong ki paitbah.
