Nongstoin, Rymphang 4: Ka ïing ryngkat ka Balang mynta ka sngi ki la ïoh ban pyndep noh ïa ka jingleh niam ba khatduh ïa ka met ïap ba dang sah jong ka kong Wansaralin Wanñiang ryngkat ïa I khun kynthei I ba na ka kpoh jong ka.
Hadien katei ka jingleh niam ba khaduh la ïohi ruh ba da ki hajar ngut ki paidbah na ki shnong bapher bapher, ki la tuid ban leit sngew lem na ka bynta kitei ki ar ki mynsiem kiba kordor bad kiba lui lui, ban rah ïa ki metïap shaduh sha u lum jingtep jong ka balang Presbyterian Tiehsaw Nongstoiñ, ban leit on tep don burom.
Kum ban shu pynkynmaw ba ka jingkhlad noh jong katei ka longkmie na kane ka sla pyrthei, ka long hadien ba u kurim jong ka ïa u ba la tip kum u Biangkupar Nongsiej u ba na ka shnong Lawse, u la pom da ka wait na ki bynta jong ka khlieh bad ka la khlad noh ha shen ha kaba katei ka longkmie ka la thiah lyngktar da ka snam ha madan ryngkat I khun I ba ha ka kpoh I ba ki ba haïing ki la nangap khmih lynti satang ïa ka sngi ka ban sa kha noh shen.
La ong ba utei u kurim u ba la ïathoh kyntiew kurim don burom ha ka 28 tarik u Nohprah 2022 u la ïashong khlad mynta la kumba 6 bnai ei ei, pynban ha ka 6:30 ei ei janmiet jong ka 2 tarik u Rymphang 2024 u la wan kyndit kynsan ban thombor ïa ka da ka wait bad pom khlem ka isynei khlem ka jingïatip lem.
