Jowai Jymmang 18: Kum ka jingpynkhreh ïa ka jingwan ka jingïapynbeit pud ka Meghalaya bad ka Assam ïa ki bynta kiba dangsah 6 tylli na ki 12 tylli ki jingïapynbeit pud (phase 2) kum ka jingpynbiang ïa ki kot ki sla kiba ïadei bad ka kam Labang-Nongphyllut bad Pangam Raliang (Block I), ki dkhot jong ka Labang-Nongphyllut bad Pangam Raliang Council (LNPC) ki la ïa kynduhlang hynne ka sngi (17/05/2022) ha Jowai.
Ha kane ka jingïakynduhlang u bah M.M. Thaiang ula pynsngew ha ki dkhot ka Seng ba ka kam Labang-Nongphyllut bad Pangam Raliang (Block I) kam dei ka kam ïa khajia pud hapdeng ka Meghalaya bad Assam, hynrei ka dei ka kam ban pynphai ïa kane ka thaiñ na Mikir Hills (Karbi Anglong ba mynta) Assam, ka thaiñ ha kaba ka sorkar Assam ka la pynkhlad bad pynïasoh jubor sha ka Mikir Hills (Karbi-Anglong) ha ka 13 tarik April 1951 tang na ka bynta ka jingbit jingbiang ka jingsynshar jong ka (Assam) hapdeng ka jingbymhun bad ka jingpyrshah jong ki Nongshong shnong ka Elaka u Dolloi Nongphyllut bad Pangam Raliang.
Shuh shuh u bah Thaiang u ong ba ïa kane ka jingpynkhlad jubor na ka United Khasi & Jaiñtia Hills ne na ka Jowai Sub-division bad pynïasoh jubor ïa kane ka thaiñ bad ka Mikir Hills (Karbi-Anglong ba mynta) Assam ha ka snem 1951, ka la duh ka la dam naba da ka hukum jong ka sorkar Assam hi kaba ka la pynmih ha ka snem 1955, ka la pynduh pyndam ïa kane ka Notification kaba 13 tarik April 1951 bad ha kaba la don ruh ka jingïapynbeit thymmai (ground demarcation) da ki ar District United Khasi & Jaiñtia Hills bad ka United Mikir & North Cachar Hills ha ka snem 1958.
Nangta u bah Thaiang u ong ba ïa kane lah ban pynshisha naba ka Labang-Nongphyllut Pangam Raliang Council, ka don ki kot ki sla kiba biang bad kaba dawa na ka sorkar Assam na ka por sha ka por ban pynphai ia kane ka thain (Labang-Nongphyllut, Nongphyllut Dolloiship) bad Pangam Raliang na ka Mikir Hills sha Jaiñtia Hills.
Nangta u ong ba ka jingpynskhem ka Assam Meghalaya Re-organisation Act 1971 ban pynneh ïa kane ka thaiñ bad ka Mikir Hills kam don jingmut eiei naba ka (sorkar Assam) ka la klet ïa ki shithi bad ki Notification jong ka kiba la pynduh pyndam ïa ka Notification kaba 1951.
Hadien ba la ïoh ïa kane ka jingpynshai bad da kaba ai copy ruh ia ki kot ki sla sha baroh ki dkhot jong ka Seng kiba la lah ban poi sha kane ka jingkynduhlang bad hadien ba la ïoh ïa ka jingkren kyntu kynpham ïa ki dkhot jong ka Seng na u bah Bony Lamare, bah Kiron Lyngdoh, bah J.S Marten kane ka jingïakynduhlang ki dkhot bad kum ka Seng (LNPC) kaba dawa ban pynwan biang ïa kane ka thaiñ sha Jaiñtia Hills ka la shim ka jingrailang katba long ba kane ka thaiñ Labang-Nongphyllut, Elaka u Dolloi Nongphyllut bad Pangam Raliang ka dei ban wan hapoh u pud u sam jong ka Ri Jaiñtia Meghalaya.
Ka Seng ka la pynbiang ruh ïa ki kot ki sla kaba ïadei bad ka jingdawa jong ka Seng bad kin sa pynpoi sha u Chairman ka District Regional Boundary Committee bad kum juh sha u Chief Minister ka Meghalaya bad sha u Chief Minister jong ka Assam bad sha u Union Home Minister bad pynkynmaw ruh ïa u (Union Home Minister) ïa ka Memorandum jingdawa kaba ki la dawa ha ka jingwan jngoh ïa ka Meghalaya .
La pynïaid ïa ka jingïalang da u bah B. Sutong uba long ruh u Vice Chairman jong ka Labang-Nongphyllut Pangam Raliang Council.
