Ka jingïakhih halor ka Lokayukta kan long ha baroh kawei ka jylla, sha Garo Hills ruh ki kyrshan: Ardent

Shillong, K’lyngkot 25: U Bah Ardent Miller Basaïawmoit, President ka VPP, u la ong ba ka sorkar kam dei ban kheiñ sting ïa ka jingïakhih ka VPP halor ka Lokayukta, namar ba wat sha Garo Hills ruh ki ai ka jingkyrshan ïa ka VPP halor ka jingtuklar ka sorkar ïa ka Lokayukta.
“Ngin pynlong ïa ka jingïakhih baroh kawei ka jylla, namar sha Garo Hills ruh ki ai jingkyrshan ïa ka jingweng ka sorkar ïa ki lai ngut ki ophisar kiba la tohkit bad lap ïa ki bamsap ha GHADC”, la ong u Bah Ardent haba kren ha ka jingïalang ha YMCA, Mawkhar mynta ka janmiet.
Kawei na ki Seng ba kyrshan ïaka VPP kadei ka Nokrek Area Development Committee (NADC), kawei pat kadei ka Human Rights and Anti Corruption Youth Power of India. Meghalaya Chapter
U President ka VPP, u la ong ba u Myntri Rangbah, u Conrad Sangma, u la ai daw ba ka sorkar kam kwah ban pyllut phut ban thung da ki ophisar kiba la shongthait ban long kum ki nongtrei jong ka Lokayukta, hynrei kan thung da ki ophisar kiba dang don ha ka kam, namar ym da donkam ka jingsiew ïa ki. U Bah Ardent u la ong ba kane ka jingkren u Myntri Rangbah ka long kaba da sngew thamula haduh katta katta, namar kajuh ka sorkar kaba ong ba kan kam kwah pyllut phut ban thung kam biang ïa kiba la shongthait kajuh hi ka sorkar kaba thungkam Chairman, thung Consultant da ki spah ngut bad jan mal ka sngi ruh ka thung.
“Ngi dang lah ïa ki ophisar kiba la shongthait ki bym tieng ïa ka sorkar ban ïa ki ophisar kiba dang trei kiba hap shu kohnguh beit katba ong ka sorkar”, la ong u Bah Ardent.
Halor ka jingtreikam ka Lokayukta, u Bah Ardent u la ong ba kane kadei ka bor kaba la pynkhamti ha ki paidbah ba kin ujor lada don kino kino ki jingpyndonkam bakla ha ka liang ka MLA Skhim lane ka jingbamsap ha ki nongtrei sorkar bad kiwei kiwei ki bor.
“Kane kadei ka bor kaba la pynkhamti ha ki paidbah bad lada kane ka bor jong u paidbah ka tlot ne mushlia noh da ka sorkar, ngim dei ban shah da lei lei bad dei namar kane ka daw ba ka VPP ka mih shakhmat ban pynlong ka jingïakhih haba ka sorkar ka mushlia”, la ong u MLA ka Nongkrem.
U Bah Adelbert Nongrum, MLA ka North Shillong, u la ther tyngeh ïaka jingtuklar ka sorkar halor ka jingtreikam ka Lokayukta da kaba ka la weng kam noh ïa ki 3 ngut ki ophisar hadien ba ki ladep ban tohkit bad lap ia ki kam bamsap ha kaba ki MLA, ki MDC ki iadonktilang.
“Ki paidbah kidei ban sngewthuh bad ba ka Lokayukata kadei ka bor treikam jong u paidbah, kam dei satia ka bor treikam jong u Myntri Rangbah u Conrad Sangma ne jong ka sorkar MDA”, u la ong, da kaba ban ba ki paidbah kidei ban kyrshan ïa ka VPP kaba la mih shakhmat ban pynkhlaiñ ïa ka jingtreikam ka Lokayukta bad ym dei ban ailad da ka sorkar kan tuklar ïa ki kam jong ka.
U la ong ba lada kane ka bor treikam ka khlañ, kan lah ban tohkit ïa ki kam bamsap ha ka jylla.
La ioh jingkren ruh na u Dr. Ricky AJ Syngkon, General Secretary jong ka Seng, uba la ong ba ka jingdon ka Lokayukta kan ïarap ïa ki paidbah ban ïaleh pyrshah ïa ki kam bamsap, kaba long kawei na ki mat treikam jong ka VPP ban ïakhun pyrshah ïa ka jingbamsap, kaba la pynduk ïa ka jylla bad pynlong ïa ka jylla ban hiar sha trai ha ka liang ka ïoh ka kot.
Ïa ka jingïalang la pynïaid da u Bah Strong Pillar Jana, u President ka VPP North Shillong.