Shillong, Kyllalyngkot 24: Ka jingïakhun hapdeng ka Nongpdeng CC pyrshah ïa ka Jersey Kings hynne ka sngi Balang jong ka lympung Shillong Cricket League 2nd division ba la pynlong ha madan Urakaliar ka la jam sha kaba kut ha ka jingïakhaid, katba ka kynhun The Occult ka la khur jingjop ha ka jingïakhun kaba bud.
Haba phai sha ka jingïakhun kaba nyngkong hapdeng ka Nongpdeng CC pyrshah ïa ka Jersey Kings, la sdang ban tied nyngkong da ka kynhun Jersey Kings hadien ba jop ïa ka toss. Ka kynhun ka lah ban kynjoh sha ka 181 ron shuwa ba baroh 10 ngut ki wicket kin shah pynhap noh na ki 19.5 over.
Ki rangtied kiba la lah ban kamai bun ron na bynta ka kynhun ki kynthup ïa u Bicky Raj Das u ba la tied haduh 60 ron naki 33 bol, katba u Raj Biswas u la lah ban kamai 46 ron na ki 34 bol.
Na ki rangkawangbol ka kynhun Nongpdeng CC kiba la seisoh bha ha kane ka jingïakhun ki kynthup ïa u Donboklang Kharkhongor (4 over: shah tied 31 ron: pynhap 5 wicket) bad u Wanbor Lamare (4 over : shah tied 24 ron: khur 4 wicket).
Haba pyrshang ban beh ïa katei ka thong ba la buh da ka Jersey Kings, ka Nongpdeng ka la lah ban pynïaryngkat ïalade da 181 ron shuwa ba baroh 10 kin shah pynhap naki 19.4 over, kaba la pynlong ïa kine ki ar kynhun ban ïakhaid.
Ki rangtied kiba la kamai bun ron ïa kane ka kynhun ki long u Maitshaphrang Khongeer (53 ron naki 22 bol) bad u Nerrykupar dkhar (61 ron naki 24 bol). Na ki rangkawangbol ka liang pyrshah kiba la seisoh bha ki long u Gopal Sunar (1 over : shah tied 6 ron : khur 2 wicket) bad u Krishna Magar thapa (1.4 over : shah tied 24 ron: khur 2 wicket).
ïa ka nam Player off the match la khur da u Donboklang Kharkhongor u ba la tyngshaiñ bha ha ka bol hadien ba u la ïoh pynhap haduh 5 wicket.
Haba phai pat sha ka jingïakhun kaba ar hapdeng ka Slog Warriors pyrshah ïa ka The Occult. ïa ka toss la jop da ka kynhun The Occult bad ka la jied ban bol nyngkong.
Haba shim ïa ka pali tied nyngkong, ka Slog Warriors ka la buh thong da 113 ron hynrei baroh 10 ngut ki wicket kila shah pynhap ha kaba tang 18.4 over ki la ïoh ban tied pyndep. U Rakesh rai u la lah ban ïarap 33 ron na ki 35 bol, katba u Prabhakar Thurah u la tied 20 ron na ki 12 bol.
Napdeng ki rangkawangbol kiba la tyngshaiñ bha ki kynthup ïa u Augsten marak u ba la kawang 3.4 over, shah tied tang 17 ron bad khur haduh 5 wicket, katba na ka liang jong u Rohit Lumbo u la kawang 4 over, shah tied 16 ron, ïoh pynhap 3 wicket.
Haba jubab ïa katei ka thong ba la buh, ka The Occult ka la lah ban tied tam da 117 ron hap 5 ngut ban khur ïa ka namjop da 5 wicket ha kane ka jingïalehkai.
Na ka liang jong ki rangkawangbol ka Slog Warriors, ba kynthup ïa u Rohan Yadav (2 over : shah tied 16 ron : khur 1 wicket) bad u Sonu Prasad (4 over: shah tied 17 ron: khur 1 wicket) ki la lehkai bha hynrei kam shym la biang ïa ka kynhun ban khur ïa ka jingjop.
U Pynbhalang Kha rsati u la ïoh ban tied 30 ron na ki 35 bol, u Saqib Khan u la kamai 23 ron naki 17 bol, katba ïa ka nam Player of the match la khur da u Agusten marak u ba la ïoh pynhap haduh 5 wicket.
