Jowai, Jymmang 17: Ki nongdie jingdie ha Iawmusiang, Jowai kim salia shuh ban sdang ka shongdie jingdie da kaba pyndonkam ïa ki lynti ïaid kjat tang ban biang ïalade bad kane kala pynthut ïa ki nongleit nongwan jong kiba bun ba lang.
Dang ha kine ki khyndiat por bala dep la ïohi ba ka jingtreishitom jong ka Dorbar Shnong Tympang Iawmusiang bad ki bor District kila lah ban pynduh ïa ki nongdie jingdie kiba shait mlien ban shong ha ki Footpath, hynrei mynta ka sngi pat la ïohi ba kine ki riew shim kabu kila sdang biang ban leh ïa kane kajuh shi kajuh ka kam beaiñ.
La ïohi ba ïa kitei ki Footpath la shongdie biang da ki katto katne ki nongdie, kaba la pynlong ïa ki nongleit nongwan khamtam kiba pli ki khynnah skul kiba la hap ban ïaid napdeng surok bah. Kane ka jingshahknieh ki lynti ïaidkjat ha kine ki nongdie jingdie ka shait wanrah ka jingma bad jingmynsaw ïa kiba bun ki briew ha shilynter jong u surok ha Iawmusiang ha kine ki por bala dep.
Kumta ki bor ba dei peit kila dei ban shimkhia halor kane bad ruh kitei ki nongshongdie ki dei ban don ka mynsiem ïatiplem, hashwa ban jia kano kano ka jingjia ba sngewsih ïa ki paidbah nongleit.
