Pynshai paidbah ka Dorbar Shnong Saba halor ka jingjia shoh kynnoh nongai taro kawei ka longïing

Jowai, Jymmang 17: U Waheh Shnong ka Dorbar Shnong Saba ma Andreas Suchiang bad u Secretary Shnong ma Ewanmi Lathong ha kyrwoh ba la phah mynta ka sngi 17 tarik la pynpaw ba ki kwah ban pynshai paidbah ïa ka khubor ha kaba ïadei bad ka jingshah kynnoh nongai Taro, ka jingkynnoh shah thang ïing bad shah beh shnong ka kong Nijanduh Phawa.
Katkum katei ka kyrwoh la ong ba kane ka jingshah kynnoh nongai taro ka kong Nijanduh Phawa kadei halor ka jingïohpang ki hynriew (6) ngut ki khynnah bad lai ngut na kitei ki khynnah ki wan phet bieij sha ka ïing jong ka.
La ong ba katei ka la jia naduh ka 14 tarik u bnai March. Haba kine ki khynnah kiba ïoh pang, ki wan phet bieij sha ïing jong ka, ki la kren ba ma ki dei ki Taro jong ka Nijanduh Phawa.
Shuh shuh la ïathuh ba kine ki lai ngut ki khynnah kiba mynshwa ki la ri ïa kata ka taro ha ïing hynrei mynta pat ki la pynshong ïa ka ha trai uwei u dieng uba don hadien ka ïing jong ka Nijanduh Phawa.
Hadien kine ki jingjia ïa kitei ki khynnah, ka la poi ka khubor sha ka Dorbar Shnong bad na ka liang ka Dorbar shnong ka la khot ïa ka Nijanduh Phawa ha ka 19 tarik u bnai April bad ka shnong ka la tohkit ïa ka. Hynrei na ka liang ka Nijanduh Phawa ka la len bad ka la maham kylla ban ai kes ïa ki nongïalam shnong.
Hadien kata pat ka la pan Dorbar biang bad ka dorbar shnong ka la khot dorbar ha ka 9 tarik u bnai May bad ha kane ka dorbar ka la kular ban pyndep ïa ka ñiam ka rukom da ka khñia ka khriam bad lada kitei ki khynnah ba kem pang kim koit satia ka kloi ban mih hi da ka mon lade napoh ka shnong ka thaw.
Na ka liang ki nongïalam shnong ruh ki la maham ïa ki para nongshong shnong ba kim dei ban thaw kano kano ka jingkulmar lane ban pynpait ia ka ïing ka sem jong ka. Ha ka 12 tarik ka pyndep ïa ka ñiam ka rukom katkum ba ka la kular. Wat hadien ba la pyndep ïa ka knia ka khriam, kitei ki khynnah 6 ngut kim shym la koit satia na ka jingpang jong ki.
Ha kaba ïadei bad ka jingshah pynpait pynpra ka ïit jingkhang jong ka ïing ka Nijanduh Phawa ha ka 14 tarik. Ha ka 15 tarik u bnai May pat, la wan hiar ki nongïalam ka kur Phawa bad dei ha kane ka por ba kawei na kitei ki khynnah ba kem pang ka la khie pang biang bad ka la leit mareh biang khlem tip briew sha ïing jong ka ha ryngkat ka jingïabud u paidbah nadien.
La ïathuh katei ka khynnah ka la kren ha ka Nijanduh Phawa da kaba ong “Dei maphi kaba ri sumar ïa nga bad mynta phi la leh beiñ ïa nga bad pynjah burom ïa nga”. Ïa kane la sakhi da u paidbah bad ki nongïalam kur ka Phawa.
Na ka liang ki nongïalam kur Phawa bad ki nongïalam shnong ki la ïa shong jingïalang ban ïakren bad ban ïa pynbeit halor kane. Na ka liang ka kur Phawa bad ki Nongïalam shnong Saba ki la rai lang ba ka Nijanduh Phawa kadei ban mih na ka shnong da ka mon sngewbha khnnang ban lait na ka jinghuri hura ne kino kino ki jingmynsaw mynsnam bad ynda ka la dep ban pynkhuid ïa ka ñiam ka rukum jong ka kaba ïadei bad ka Taro yn sa shah biang ïa ka ba kan wan sha shnong.
Shuh shuh na ka liang ka Dorbar shnong ruh ka la buh ka jingmaham ïa ki nongshong shnong ba kim bit ban leh ïa kino kino ki kam sniew pyrshah ïa ka ïing ka sem jong ka Nijanduh Phawa.
Hynrei ha kane ka juh ka sngi, katta ha ka 15 tarik u bnai May, ka ïing jong ka, ka la shah tang bad na ka liang ki nongïalam ki la ïoh jingtip ïa kane ha ka 16 tarik ka bor shnong kala leit ban jurip ïa katei ka jingjia bad la lap ruh ba ka ïing jong ka Nijanduh ka la shah thang shisha.
Na ka liang ka shnong ka la kylli tohkit ban lap ïa ki nongleh ïa katei ka kam hynrei kam lap satia ïano iano ba donkti bad kala buh ha ka jinglyngngoh kaba khraw namar ha ka 16 tarik ka kong Nijanduh Phawa bad u lok jong ka, u Nicholas Nartiang ki la leit ujor noh sha ki pulit ha Nartiang bad ka la mih ruh sha ki lad pathai khubor.
Ha ka 17 tarik Bnai May na ka liang ka bor shnong ka la shong jingïalang biang bad ha kane ka jingïalang ka Dorbar ka la rai ban ai ïa kane ka ka jingpynshai paidbah. Pynkut katei ka kyrwoh.