Lynñiar ki nongrep namar ka jingshah lynshop ki jingthung ha ka um saw

Mawkyrwat, Jymmang 17: Ka long kaei kaei kaba pyndiaw mynsiem na ka bynta ki paidbah nongrep jong ka dong ka thaiñ Mawkyrwat baroh kawei ha kaba da ka jingwan lynshop ba kynsan jong ka um saw ha ki khyndiat sngi ka la long pynban ka jingduh nong kaba khraw ha ka liang ka rep ka riang namar baroh ki jingtrei shitom jong ki nongrep ki la shu long leh noh ei bad ka jingduh nong ki nongrep phan ka lah long da ki hajar kwintal ei ei.
Lah ban kdew ba kane ka jingjia ba wan shah lynshop jong ki jingthung jingtep jong ki nongrep ka long da ka jingwan jong u slap bah ‘lap san naduh ka step jong ka 13 tarik u Jymmang, 2022 ha kaba ka la pynlong ïa ki um ba ki kiew ha ka jingdon jong ka um bad tap lup ïa baroh ki jaka rep kiba don hajan jong ki wah. “Ka jingtap jong ka um saw ïa ki jaka rep phan bad rep syieng ka la long ka jingduhnong kaba khraw namar u jingthung um long shuh ban buh slem.
Ha kane ka sngi na ka liang ki nongrep ha ryngkat u President ka Hill Farmers Union (HFU) jong ka Central Body, bah Commander Shangpliang lem bad u Block Development Officer (BDO) jong ka Mawkyrwat C&RD Block, bah I. Lawryniang, MCS ha ka jingleit jurip ïa ki jaka rep ha ka thaiñ shiliang-um ha Shnong Jashiar, South West Khasi Hills District ki la lap shisha da la ki jong ki khmat ba ka jingshah pynjulor jong ki jingthung ka la long kaba i synei bad kane ka la pynduh mynsiem shikatdei eh na ka bynta ki nongrep bad khamtam eh ïa ka jingtrei shitom jong ki baroh shi snem.
Haba kren ha u nongthoh khubor, kawei na ki nongrep na katei ka shnong ka la pynpaw ka jingsngewdiaw bad ha kajuh ka por ka ong ruh ba ka la pynduh mynsiem ruh ïa ki namar ki jingtrei shitom jong ki naduh ba sdang ban lur ïa ka khyndew, ban thung bad haduh ba un da heh ne dei ba por ban ai khyndew ha kaba kine baroh ki la shu long leh noh ei tang ha ka shi khyllip mat. Ka la ong ruh ba kaba pynlong ïa ki kumta, ka long namar ha kane ka taïew ba la dep ba da ka jingwan jong u slap bah ‘lap san ka la pynlong ïa ki wah bah ba kin kiew ha ka jingdon jong ka um bad pynpoi haduh ki jaka rep jong ki bad ka jingwan poi jong ka um ha ki jaka rep ka la pynlong ïa ka um ba kan rong naphang ïa ki jingthung jingtep bad don ruh ki jingthung kiba la shah rong noh ha ka um kaba la wan ban tuid.
Ka la ïathuh ruh ba da ka jingshah pynjulor ha ka mariang, bun ki phan ba ki ki thung ka la mih ha jrong jong ka khyndew bad haba leit ban tih noh ïa ki bad rah sha la ïing ruh tang ha ka shi sngi ki la kylla pyut namar ka jinglynshop jong ka um. Namarkata, kane ka la pynlong ïa ki nongrep ba kin mat ïa shibun ki jingeh namar tang ban lum ïa u phang ba ïa bam ha ïing ruh kim ïoh shuh bad ha ka jingpynïaid ïew lei lei ynnai ïa kren shuh ba ymdon hi ruh u phan u ba long ban leh kumta.
Ha ka por ka la ïathuh ruh ba kum kane ka jingjia kam pat ju jia shuh hynrei dei tang ha u snem 2004 bad mynta u snem 2022 ba ka jingwan lynshop ka um saw ka la pynlong ïa ki mar rep jong ki ba kin duh wat ban buh ïa u symbai ruh.
Katba na ka liang u President ka Hill Farmers Union (HFU) jong ka Central Body, bah Commander Shangpliang hadien ka jingleit ban jurip ïa ki jingshah pynjulor jong ki jngthung na ka daw jong ka jingshlei ki um ki wah bad tap lup ïa ki mar rep jong ki hapoh jong ka Shnong Jashiar bad shi lynter jong ka Wah Rilang. Ha kane ka jingleit jurip u la ong ba la lap ba kiba bun ki jaka rep kum ïa u phan bad u syieng ki la shah pynjulor lut, kumta halor kane ka bynta u la pynpaw bad ïathuh ba la dep ban ai jingtip sha u BDO jong ka Mawkyrwat C&RD Block ha kaba ma u ruh u la wan hi da lade ban jurip bad kumjuh ruh hapoh ka District Horticulture Office, South West Khasi Hills District ba kin sa leh ïa kaba donkam.
Namarkata, kum u nongïalam ba hakhmat eh jong ki nongrep u la ai ka jingkyntu ïa ki paidbah nongrep ba haba jia kum kine ki jingshah pynshop ha ki bor jong ka mariang kim dei ban shu sngap ne peit jaw ummat tang ha la lade hynrei dei ban mih shakhmat ban pyntip ha ki bor ba dei peit lyngba ka jingai jingtip jong ki ha ki nongïalam shnong, ki dkhot jong ka HFU ne wat ha Gram Sevak khnang ba ma ki kin lah ban rah ïa ki jingeh sha ki bor ba halor.
Ha kajuh ka por u la kyrpad ruh ïa ki nongrep ba kin phah ïa ki kyrteng jong ki, ka jingjulor jong u symbai ba ki ki la thung la ka long ïa u phan ne u syieng hapoh ka ophis jong ka District Horticulture Office, South West Khasi Hills District khnang ba ma ki ruh kin lah ban phah ïa kine ki jingpyntip sha ki bor ba halor.
U la ong ruh ba kum ka union ka dawa na ka sorkar ba halor ka jingshah pynjot ki jingthung ha u khñiang bad kumjuh ruh ha ka um saw ba ka dei ban ai ki lad jingïarap kham kloi khnang ba kan long ka jingmyntoi ym ki jingïarap ba tang malu mala ne ka jingibeiñ hynrei dei ban ai jingïarap katkum ka jingjulor jong ki jingthung.