Jowai, Nohphrah 30: Ïa ka lyngkhuh sngi ïap ba 161 jong u Khlawait ka Ri 12-Dolloi u Woh Kiang Nangbah, la rakhe pyndon burom mynta ka sngi ha Kiang Nangbah Memorial Park Madiah Kmai Blai harud jong ka Wah Syntu Ksiar, bala pynlong da ka Kiang Nangbah Iasiat Khnam Memorial Society (KNIKMS), Jowai.
Ha kane ka sngi ka kong Santa Mary Shylla (MLA) kala long kum ka kongsan ha ryngka ka jingdonlang u symbud kongsan ma A. Lakiang Joint Secretary Governor Secretariat, Raj Bhawan Shillong, u President ka KNIKMS ma C. Najiar, Founder Member, ki nongkitkam ka KNIKMS nalor ki paidbah kiba la wan sakhi lang ïa kane ka sngi.
Ka kong Santa Mary haba ai jingkren kala buh ka jingkyntu ïa baroh ki nongshong shnong ban kynmaw burom ïa kane ka sngi kyrpang u Woh Kiang Nangbah, ym tang ha nongbah Jowai hynrei ha kylleng ki jaka jong ka Ri-Lum Jaiñtia, kala ong ruh ba u Kiang Nangbah ba long u nongïaleh laidluid ïa ka ri bad ka jaitbynriew.
Ha ka juh ka por ka kyntu ïa kane ka Society ba kan nang bteng ïa kine ki kam ba bha ban pynsah kynmaw ïa u Khla wait ka Ri u Woh Kiang Nangbah ban sah jingkynmaw ïa ka pateng khamtam ïa ki khynnah pule ba kin ïoh jingtip ba khambniah shaphang jong u.
Ha ka juh ka por kala ai khublei kyrpang ïa kane ka Society kaba trei shitom ïa ki kam ba bha, ym tang ka jingmyntoi shimet hynrei na ka bynta ka jingbha jingmiat jong baroh lang. Na ka liang ka kong Shylla kala kular ban kan don bynta ban ïarap ïa kane ka Society ha kiba bun ki liang.
Ha kane ka sngi ka kongsan kala leit ban buh ruh ïa u syntiew ha trai jong u mot u Kiang Nangbah bad pynher ïa ka lama jong ka Kiang Nangbah Iasiat Khnam Memorial Society. Ha kane ka jingbuh syntiew la ïashim bynta lang da ki seng bhalang bapher bapher.
La pynphuh pynphieng shuh shuh ïa kane ka sngi da ki jingleh drama lyngkot, ki jingshad pliang, ki jingrwai kyrpang. Ha ka juh ka por la sam ruh ïa ki khusnam sha ki nongjop haka jingïasiat khnam ha ki kyrdan bapher bapher ba la pynïaid da ka KNIKMS.
Mynta hi ka sngi ha ka por 10 waje mynstep la rakhe pyndon burom ïa kane ka lyngkhuh sngi ïap ba 161 jong U Kiang Nangbah ha madan Mynkoi Pyrdi Iongpiah, Jowai ba la pynkhreh da ka Seiñ Raij Jowai ha ryngkat ki prokram bapher bapher.
Ha kane ka prokram u MP ka Rajya Sabha Dr. Wanweiroy Kharlukhi ula long kum ka kongsan ha ryngkat ka jingdonlang u President ka Sein Raij ma Hercules Toi, Dolloi ka Elaka Jowai ma Puramon Kynjing nalor kiwei de.ing ba duk ba rangli bad ki nongïalam ka SRS Ri-Bhoi hahjaka prokram sam jaiñ kup syaid mynta ka sngi ha Iewmawlong.
