Shillong, Nohprah, 23: Ka United Democratic Party (UDP) shen kan sa shim ïa ka rai ha kaba ïadei bad ka jingai jingkyrshan jong u MDC ka Nongkrem Constituency u Bah Lambor Malngiang ïa ka Executive Committee ba la ïalam da ka National Peoples Party (NPP) ha Khasi Hills Autonomous District Council (KHADC).
Ha ka jingïakren bad ki lad pathai khubor, u nongïalam ka Parliamentary Party jong ka UDP u Bah Titostarwell Chyne u la ïathuh ba ka Parliamentary Party ka dawa ïa ki nongïalam jong ka UDP ban pynshitom mardor ïa u Bah Lambor Malngiang namar ka jingleh pyrshah ïa ki kyndon treikam jong ka party.
“Nga dang shu dep ban phah ïa ka shithi sha ka Party. Lehse hadine ka Christmas, kin sa shong ban shim ïa ka rai,” la ong u Bah Titos ha ka jingïakren bad ki lad pathai khubor.
Haba kylli, u Bah Chyne u la ong ba um don jingtip eiei ruh em la kin dang don shuh shuh kiwei pat ki MDC jong ka UDP ki ban leit ai jingkyrshan ïa ka EC ba mynta.
“Ki don 8 ngut ki MDC jong ka UDP. Ngam pat ïohsngew eiei (ba kin leit ai jingkyrshan ïa ka EC ba la ïalam da ka NPP). Ha kajuh kapor, ngam pat ïohsngew ba u MDC ka HSPDP u Bah Martle Mukhim, uba long ruh u Co-chairman jong ka RDA, un mih shakhmat ban leit ai jingkyrshan ïa ka EC ba mynta,” u la ong da kaba bynrap ba wat u MDC Independent na Nongthymmai u Bah Latiplang Kharkongor u dang ïai neh beit ha ka Liang Pyrshah.
U la ong ba u MDC ka UDP u Bah Ba lajied Ranee u la pynpaw ba un ai jingkyrshan beit ïa ka Lineage Amendment Bill namarba u dei uwei uba ju kren bha halor ka Shaw Bhoi. “U (Bah Ranee) kyrshan i aka Bill ym ïa ka EC,” u la ong.
“Watla katta, phi lah ban kylli na u Bah Ba lajied u don jingthmu neem ban leit pynïasoh bad kiwei pat ki party,” u la bynrap.
