Shillong Nohprah 22: Ka Khasi Hills Autonomous District Council (KHADC) hynne ka sngi Thohdieng kala pynlong ïa ka jingrakhe ban pdïang ïa ka jingwan ka Kristmas bad Snem Thymmai bad kane kadei ka sien kaba nyngkong eh ban pynlong ïa kum kane ka jingrakhe hapoh Council kaba la long kaba shongkun bha.
Ha kane ka jingrakhe la wan ban ïadonlang u Myntri Rangbah ka jylla Conrad K Sangma ha ka jingïadonlang u CEM ka KHADC Bah Pynïaid Sing Syiem, ki MDC, ki ophisar bad ki nongtrei jong ka KHADC.
Haba ai jingkren ha kane ka sngi, u Myntri Rangbah ula ong, naduh ba u Bah Pynïaid Syiem ula shimti kum u CEM kala don ka jingïatreilang kaba ïajan bha hapdeng ka KHADC bad ka sorkar jylla bad ula ong ba u CEM ula trei shitom ban phah ïa ki jingtyrwa bapher bapher sha Delhi bad ka Council kala ioh ruh ïa kiba bun ki kam pynroi.
Ula ong ba ka sorkar pdeng kala dap da ka jingsngewtynnad ïa ki jingtyrwa kiba la phah da ka KHADC bad na ka lïang jong ka sorkar jylla ruh kala shimkhïa lang halor kine ki jingtyrwa jong ka KHADC bad u ngeit skhem ba ka Council kan sa ioh pdïang bun ki kam pynroi.
“Ngin bteng ban ïa treilang hapdeng ka KHADC bad ka sorkar jylla na ka bynta ka bha ka mïat jong ki paidbah” ong u Myntri Rangbah.
U Conrad ula ong ruh ba kadei ka sien kaba nyngkong eh ïa u ban ïashimbynta lang ha ka jingrakhe kaba la pynlong hapoh KHADC bad u sngewtynnad ruh ban tip ba ha ka sien kaba nyngkong eh, ka KHADC ba la pynlong ïa kum kane ka jingrakhe bad jingïaleh kmen.
Ha kane ka jingrakhe la ioh ruh ïa ki jingrwai kyrpang na u MDC ka Mawhati Bah Charles Marngar, u MDC ba shu thung Bah Bindo M Lanong bad ka jingrwai kynhun na ki MDC.
Nalor kane la ioh ruh ïa ki jingrwai na ki nongtrei jong ka Council bad na ki kynhun bapher bapher kiba la rwai ïa ki jingrwai Krismas kiba la pynsngewtynnad bad pynrhem ïa ka mynsiem jong baroh kiba ïashimbynta.
