Ki tamasa ki dei ban kyntiew ïaki kam jngohkai pyrthei, ym ban leh khlemakor

Ka jingpynlong ïaka tamasa leh kmen lane ki Festival bapher bapher hapoh ka jylla ka jingthmu ka long ban kyntiew iaki kam jngohkai pyrthei ban khring iaki nongshangkai ban wan na kylleng sawdong pyrthei, lyngba ki tamasa leh kmen bad ki festival ba ki riew donsap ki ioh ka lad ban pyni rynsan iaki sap ki phong ba ki don la ka dei ha ka rwai ka siaw, ka put ka tem bad kumta ter ter.
Hynrei kaba sngewsih ka long ba haka Cherry Blossom Festival kaba la long ha Lumdaitkhla Bhoirymbong Madan Kurkalang ka wanrah ka jingleh raiñ bad jingjah burom, ïaka dong ka thaiñ bad ka jylla, ka jingshad kyrshut met kaba khlem akor jong kato ka kynthei bad u Negro u nongrwai ba pawnam kala ai ka khubor kaba isaitmet kaba sngewleh raiñ, sngew jah burom hakhmat ka pyrthei.
Ym dei ba ngi lorni ne lushia ïaka kam shimet jongno jongno, phi lah ban shad, phi lah ban rwai phi lah ban leh kmen da ka burom ka akor. Ka jingleh shad khlem akor jong kato ka kynthei ka long shaba palat pud, kala pynlehraiñ bad pynjah burom, ngi kum ka jaitbynriew bad ka imlang sahlang hapoh ka jylla ngim lah ban pdiang da lei lei, khamtam ka kynthei ka dei ka nongri, ka nongpeit nongkhmih ïaka iing ka sem, ka burom ka ijot, ka nonglum nonglang, ka Blei long iing long sem ka lukhimai kaba ngi ong.
Ka jingleh jong kato ka kynthei ka long kum ka jingïalam lynti bad ka nuksa ba sniew ba ki nong wei nong ar ki poi ei kin sngew shngaiñ sngew shlur ban shim kabu ban leh ki kam sniew ki kam pohjait ban jrongkti haki kam thombor, batbor ïaki kynthei ki khynnah. Namar kata ki bor jong ka aiñ, ki dei ban kem da kaba set along bad ai jingsneng ïa kato ka kynthei kaba shad khlem akor khnang ba kum kine kiei kiei kiba pynthoh bria bad pynjah burom iaka jaitbynriew bad ka jylla kin ym jia shuh hadien ha bud nangne sha khmat.