Shillong, Nohprah 04: Ka lympung ïalehkai phutbol 2nd DIVISION Football League 2023 ba la pynïaid da ka Shillong Sports Association ka la nang ïaid shakhmat bad hynne ka Sngi la ïoh ban pyndep ar tylli ki jingïakhun ha kaba ka kynhun Pohkseh SC ryngkat bad ka Smit SC ki la khur namjop.
ïa ki jingïakhun la pynlong ha SSA Ground, bad la sdang ïa ka jingïalehkai kaba nyngkong ha ka por 11:30 baje mynstep hapdeng ka Pohkseh SC pyrshah ïa ka Imson SC, ha kane ka jingïalehkai ka Pohkseh SC ka la jop suk da 3-0 kol.
Ka Pohkseh SC ka la ïoh ban lamkhmat tang hadien 5 minit ba la ïaid ka por lyngba ka kol u Reinjoywell Wartde shuwa ba u Wanjoplang Khriam un thep ïa ka kol kaba bud ha ka 31 minit kaba la pynlong ïa ka kynhun ban lamkhmat da 2 kol ha ka kylla kaba nyngkong.
Nalor kitei ki ar kol, ka Pohkseh SC ka la pynthikna khur namjop na kane ka jingïakhun lyngba ka kol kaba lai kaba la thep da u Bradley Kharkongor ha ka 60 minit.
Haba phai pat sha ka jingïakhun kaba bud, ka long shisha kaba itynnat bad kaba ïakhaid hapdeng ka Lumshyiap SC pyrshah ïa ka Smit SC, bad ka jingïa pynkhihjar ka la wan na baroh arliang hynrei ha kaba khadduh dei ka Smit SC kaba la ïoh thep tam da 2-3 kol ban ïoh khur ïa ka namjop.
Ha ka jingïakhun, ka Smit SC ka la ïoh ban lamkhmat nyngkong lyngba u Bankyrshan Ryngdang ha ka 14 minit, hynrei u Aldomac Nongneng u la ïaoh ban pynïakhaid na bynta ka Lumshyiap SC ha ka 37 minit bad buh ruh ïa la ka kynhun ban lamkhmat lyngba ka kol kaba ar ha ka 39 minit.
Da kaba lamkhmat da tang shi kol kam shym la pynthikna ïa ka Lumshyiap SC ban khur namjop ha kaba Smit SC ka la ïoh pynïakhaid lyngba u Kalbest Pathaw ha ka 77 minit shuwa ba u Dameshwa Nongneng un thep ïa ka kol pynjop ha ka 79 minit.
