Nongstoiñ, Jymmang 15: Ka HYC Mawshynrut ka la ïoh ban pynskhem biang ïa ki nongïalam jong ka ha ka sien kaba lai. Kane ka jingpynskhem ka la long ha ka sngi saitjaiñ ha kaba la ïadonlang da ki nongïalam jong ka District bad na ka sengkmie ruh kumjuh.
Ha ka jingïalang pyntian smai, u samla Jerimaïa Dkhar President HYC Maweit Circle u la pynkynmaw ba ha ka jingshakri ïa ka Jaitbynriew hap mad bun ki jingeh, hynrei ka donkam ban ïa tylli ban ïa kyntiew iwei ïa iwei. U Samla Wanteibok Lyngdoh GS HYC West Khasi Hills District, u la pynkynmaw ba dang don bun kiei kiba donkam ban leh watla katto la trei shitom ha ki 8 snem ba la dep, ban peit ïa kiba bun ki jingduna ïa ka thaiñ bad ban ïada ïa ka Jaitbynriew na ki mynder.
U Bah B Paliar u ba dei u Vice Chairman ka Shnong Riangdo u la ai jingïaroh ïa ka HYC, kaba u la ïohi shibun kiei kiei kiba ki leh ïa ka Jaitbynriew. U la ong ka dei ka seng kaba kiew sted namar ki don ki nongïalam kiba trei shitom. U la ong ba na ka liang ka shnong ka kyrshan bad ïatreilang ha kano kano ka por.
U Samla Lumlang Kharsyiemlieh President HYC WKHD u la ong ban shakri ïa ka Jaitbynriew, donkam ban ïa tylli ban kiar na ka dih ka bam bad ban don ka mynsiem sngew lem ïa kiwei. Balei ngi pynlut ïa ka por ban dih kiad hynrei ngi dei ban ïarap noh ïa ki ba duk ki khunswet ha ka jaka ban thied kiad.
Na ka liang u Samla Joplang Kharnaior Assistant GS ka HYC Sengkmie, u la pyntian smai ïa ki Nongkitkam ka HYC Mawshynrut Circle bad u la kyntu kynpham ïa ki shipai ban peit pyrman ïa ka Jaitbynriew namar ngi ïohi don bun satang ki jingpynjot.
U la Pynkynmaw ïa ka jingïakhun ïa ka ILP ka long kaba jwat haduh ki da mynjur da ka sorkar MDA. Mynrei mynta ngim dei ban shongthait haduh ngin da ïoh ïala ILP kaba pura, ngim dei ban shaniah ïa kine ki ‘lei san snem kiba shu shukor ïa ngi man man ka por.
Ïa ki nongkitkam ba lai jong ka Hynñiewtrep Youths Council Mawshynrut Circle na ka bynta ka samoi treikam 2022 haduh 2025, lah pyntian smai da u Samla Joplang Kharnaior. Ki nongkitkam ki long President u samla Losbingwel Lyngkhoi, Vice President u samla Aurelius Nongsiej bad u Samla Phersngi Nongbri, General Secretary u Samla Banteilang Hoojon, Assistant Secretary u Samla Ardonald Marbaniang bad kiwei kiwei de.
