Thaw la ka jong ka Electoral Roll ha GHADC dawa ka GSU na u CEM

Tura, Jymmang 14 : Ka Garo Student Union (GSU) ka dawa na u Chief Executive Member (CEM) jongka Garo Hills Autonomous District Council (GHADC) ba dei ban thaw noh la ka jongka Electoral Roll bad ban thaw da ka aiñ na ka bynta ki Riti ki Dustur jong ki paid Garo. Ka dawa ruh ban thungkam biang ïa baroh kito ki nongtrei ba la shah weng bad ban siew ruh ïa ka tulop ba 27 bnai jongki nongtrei.
Ha kaba ïadei bad ka Electoral Roll ka GSU ka pynpaw ba ka daw ba ka dawa ka long ba la pynkheiñ bad ïuhroit ïa ki kyndon aiñ ka Sixth Schedule namar la ailad ïa kiwei ki jaidbynriew bym trei trai ri trai muluk ban ïashim bynta ha ka election MDC. ïa ka Sixth Schedule la thaw khnang ha ka Riti Synshar jongka ri na ka bynta ban ïada ïa ki riewlum ne trai ri rit paid bad ban ïada ïa ki Riti ki Dustur jongki bad kumjuh ruh ban kyntiew ïa ki ha ka jingnang jingstad bad ka roi ka par.
La wanrah ïa ki Autonomous District Council da ka jingthmu ban synshar hi bad ban ïada ïa ki trai ri trai muluk ha ki bynta bapher bapher. Kumta ban ïashim bynta ha ka GHADC la ka dei ha ka election ne synshar khadar ka dei ban tang ki trai ri trai muluk. ïa kane ka thaiñ shatei lamngi la ker sawdong da ki ri ba marjan bad ki bynta khappud ki long haduh 3742 Km namar la ker tawiar ïa ka da ka Bhutan, Tibet, Myanmar bad Bangladesh. Ki aiñ ba kyrpang ba la thaw ki dei ka Sixth Schedule bad Artcle 371 A ha Nagaland bad 371G ha Mizoram. Kine ki aiñ ki ïada ïa ki Riti ki Dustur, ki jaka puta bad ïaki hok jong ki trai ri kane ka thaiñ.
Kumta halor kane ka nongrim ka GSU ka dawa ba dei ban thaw la ka jongka Electoral Roll ïa ka GHADC khnang ba kiwei ki jaidbynriew kin ym ïoh ban ïashim bynta.
Balei ba ym kwah ba ki jaidbynriew bar jylla kim dei ban ïashim bynta ka daw ka long ba ïa ka GHADC la thaw kyrpang ban ïada ïaki paid Garo bad ki Riti ki Dustur jongki, ong ka GSU.
Nalor kane la dawa ruh ba dei ban pynsted ban mynjur ïa ka Codification of Garo Customary Law. Namar kumba longmynta ki paid Garo ki la nang rit paid ha la ka ri la jong bad kumta ym kwah ban kylla kum ka Tripura bad ka Lower Assam bad ki jaka thor jongka Garo Hills. Namar ha kine ki jaka la bun paid da kiwei ki jaidbynriew ban ïa ki trai shnong. Kumta nalor ka Sixth Schedule bad ka Land Transfer Act 1971 donkam ruh sa ka Codification of Garo Customary Law khang ban ïada ïa ki riti dustur tynrai jongki paid Garo.
Kane ka jingdawa ruh ka dei kaba la slem bah kaba la sdang naduh u 2009 kaba la shim khia da ki MDC Garo, ka Council of Nokmas bad wat ka ANVC hi ruh. Kumta ka GSU ka kwah ba u CEM ka GHADC u dei ban pynsted noh ïa kane ka kam ruh. Nalor kane la dawa ruh ban thung kam biang ïa kito ki nongtrei ba la shah weng na ka GHADC bad kumjuh ruh ban siew dep noh ïa ka tulop ba 27 bnai jongki nongtrei. Namar wat hapdeng ka jingbym ïoh tulop ki nongtrei ki wan bad pyndep beit ïa ki kam ophis bad ïa kane dei ban ai ka jingiaroh, ong ka GSU. Kumta sa shisien ka GSU ka kyntu jur ïa u CEM ban shim khia ban pyndep ïa kine ki mat kiba ka la kdew haneng.