Ban lait na ka shah thok pisa, pan jingïatreilang ka KSU ïa ka SBI Ladrymbai
![](https://mawphor.com/wp-content/uploads/2022/05/mawphor-1.jpg)
Shillong, Naiwieng, 21: Ka Khasi Students Union (KSU) East Jaiñtia Hills District Unit ha ka sngi Baar ka la kyrpad ïa u Branch Manager jong ka State Bank of India (SBI) Ladrymbai Branch ba un pynshai bad pynsngewthuh ïa ki paidbah hadien ba ka seng ka la ïoh ujor halor ka jingshah thok bad shah pynngop ha ka kam pisa da kaba kular ban ai nong shibun tang da ka jingsiew pisa kaba rit lyngba ki Kompeni n eki Online Gaming, Online Trading kiba thok.
Ka seng hapoh ka jingïalam jong u Asst Secretary u samla Pynshai Kupar Dkhar bad ki la ïakynduh ïa u Branch Manager jong ka SBI Ladrymbai ban ïatrei lang bad ka seng da kaba pynlong ïa ki jingpynshai paidbah halor kine ki jingshah pynngop jong ki paidbah ba luilui ka East Jaiñtia Hills District ba kynthup naduh ki khynnah skul, ki samla pule kolej, ki longkmie bad ki rangbah.
“Khnang ba kin lait na ki jingshah pynbiej ha ki kompeni, Online Earning Apps lane ki briew ba kular ban pynïoh nong shiphew shah na ka jingpynlut ba khyndiat, u Branch Manager u la pdiang sngewbha ïa ka jingtyrwa jong ka seng bad kular ruh ban ïasnohkti lang bad ka seng ban ai jinghikai ïa ki paidbah ban lait na ki riew shim kabu kiba kwah ban bam pisa ei khlem da pynmih syep ïa ka pisa jong u paidbah,” la ong u kyrwoh na ka seng.
Ka KSU ka kyntu ruh kumjuh ïa ki paidbah ban long kiba husiar bha ïa kino kino ki jait kompeni lane ïa kino kino ki briew kiba khroh ïa ki ban kamai suk.