Ka PFR FA ka lahduh ha ka SSA 3rd Division

Shillong, Naiwieng 20: Ka kynhun ïalehkai phutbol jong ka Pay For Right Football Academy kaba la tip lyngkot da ka PFR-FA ka la ïohrah ïa ka namlahduh ha ka kyrdan ïakhun jong ka SSA (SRGT) 3rd DIVISION Football League 2023 hadien ka namjop ha ka final kaba la long hynne ka Lah Sngi U Blei ha madan 1st Ground SSA Stadium pyrshah ïa ka Mylliem Lum SC.
Ka jingïakhun ka la long kaba itynnat ha kaba baroh arliang ki la ïakhun tyngeh naduh kaba sdang jong ka por haduh kaba kut hynrei dei ka PFR-FA kaba la seisoh ha ka jingïoh pynkhihjar da kaba thep 2 kol ban kylla long ka lahduh jong kane ka kyrdan 3rd Division.
Ha kane ka sngi la wan sakhi ïa ka jingïakhun da u President jong ka MFA, u Bah Hamletson Dohling lem bad ki dkhot ka Meghalaya Football Association nangta ki dkhot nongkitkam jong ka Shillong Sports Association (SRGT) bad kiwei kiwei kiba la sam ïa ki khusnam.
Haba phai sha ka jingïalehkai kaba la sdang naduh ka por 2 baje nohphaisngi, ka jingïakhun ha ka kylla step ka long kaba kynjah naba ym shym la don ba ïoh pynkhihjar wat hadien ba baroh ar kynhun ki la ïakhun tyngeh ban ïoh thep.
Dei hadien ba la sdang ïa ka jingïakhun ha ka kylla miet ba la sdang shongshit ka jingïalehkai ha kaba ka PFR FA ka la ïoh ban lamkhmat shi kol lyngba u Robi Maring ha ka minit kaba 62.
Hadien katto katne por ba ka kynhun ka la ïoh ban thep ïa katei ka shi kol, u Andy Suting u la ïoh ban pynbud sa ïa ka kol kaba ar ha ka 70 minit kaba la nang pynskhem shuh shuh ïa ka jingkyrmen jong ka PFR-FA ban rah ïa ka namlahduh.
Ka PFR FA kaba la long ka lah duh ka la ïoh khur ïa ka song pisa kaba T.40 hajar katba ka Mylliemlum kaba wan ba-ar ka la ïoh pdiang ïa ka song pisa kaba T.20 hajar.
Watla kata ruh baroh kynhun kiba ïakhun ïa ka final jong ka 3rd Division, kata ka Pay For Right Football Academy ryngkat bad ka Mylliem Lum SC ki la shah kyntiew kyrdan sha ka 2nd Division na ka bynta ka aïom lehkai jong u snem ban wan.