Na u Jt. Director ka tnad Water & Soil Conservation dawa weng kam ka RBYWO ïa u bar jylla ba la kynnoh thungkam sop sop ha CTI Byrnihat

By Mawphor Editor On Nov 9, 2023

Nongpoh, Naiwieng 08: Ki nongïalam ka Ri Bhoi Youth Welfare Organization (RBYWO) mynta ka sngi ki la leit syndon ban kynduh ïa u Joint Director ka Soil & Water Conservation ha Conservation Training Insitute, Byrnihat na ka bynta ban dawa ban weng kam mardor ïa uwei u bar jylla ba la kynnoh thungkam sop sop wat ha ka post Muster Roll kaba dei naduh ka 1 tarik u Naiwieng 2023.
Kane ka jingleit kynduh kine ki nongïalam ka RBYWO ïa u Joint Director katei ka tnad treikam ka dei hadien ba ka seng ka la ioh jingtip halor kine ki kam thungkam sop sop, kaba la pynlong ïa ka seng ban leit kynduh bad ban dawa na u Joint Director ba ki dei ban weng kam mardor ïa utei u bar jylla bad ban thung thymmai da u briew ba na ka jylla Meghalaya namar ki don shibun ki khasi kiba lah ban trei ïa katei ka kam.
Haba leit ban kynduh mynta ka sngi ïa utei u Joint Director la ïalam da u Vice president ka RBYWO, u Samla Elvis Kyrsian bad u General Secretary, u Samla Kenny Nongrum lem bad ki dkot, kiba la leit syndon ban kynduh ïa u, ha ka ophis treikam jong u, ha CTI Byrnihat.
Kumba la pynpaw da kitei ki nongïalam ka RBYWO ïa u Joint Director, u Bah O.T Lyngwa, la ong ba utei u bar jylla ba la thungkam Muster roll u dei uba la tip kyrteng kum u Jyoti Das uba dei na Nalbari Assam bad katei ka tnad treikam ka la thungkam naduh ka 1 tarik u Naiwieng 2023.
Haba kren sha ki lad pathai khubor, u Vice president ka RBYWO, u Samla Elvis Kyrsian, u la ong ba ka seng ka pyrshah jur halor kane ka jingthungkam ïa une u bar jylla, uba dei na ka jylla Assam wat la ka dei ka post Muster Roll bad kumba la ioh jingtip na u Joint Director la kynnoh ba kane ka jingthungkam ka dei kaba la ai hukum da ki bor bahalor hapoh katei ka tnad sorkar ka jylla.
U la ong ruh ba ka seng kam lah ban pdiang ïa kane ka jingthungkam da ki bar jylla kiba na shabar ka jylla wat ïa ka kam Muster Roll bad hato ki samla ka jylla kim lah mo ban trei ïa katei ka kam ha kaba la hap ban thung kam na shabar ka jylla ha kaba bun ki samla trai jylla ki hap ban shong khlem kam khlem jam, ong utei u nongïalam ka RBYWO.
U la bynrap ruh da kaba ong, ba ka seng ka sngew bitar ïa u Director katei ka tnad Water & Soil Conservation, namar wat ïa ki kam muster roll ruh la shu thung kam da ki briew kiba na shabar ka jylla, kata ruh ka tulop kaba T. 14 haduh T. 15 hajar kaba ktah ïa ka lawei ioh kam ioh jam ki samla trai jylla.
Namarkata, u la bynrap shuh shuh da kaba ong ha ka jingkynduh ïa utei u Joint Director katei ka tnad treikam, ka seng ka la dawa mardor ba dei ban weng kam noh ïa utei u bar jylla ba la shu thungkam sop sop bad na ka liang ka seng ka la pyntip ruh sha u Deputy Commissioner ka Ri Bhoi ba u dei ban tehlakam halor kane ka kam thungkam beaiñ kaba khlem da ïaid katkum ka lynti, u la bynrap.