Ka Balang Katholik ka la synñiang bha sha ka pule puthi bad ka koit ka khiah ha ka jylla : CM

Tura, Naiwieng 05 : U Myntri Rangbah ka Jylla u Conrad K Sangma, u la ong ba ka Balang Katholik ka la dei kawei na ki Balang kaba la noh synniang bha ban kyntiew ïa ka pule puthi bad ka koit ka khiah ha kane ka jylla bad halor kane u la ai jingïaroh ïa ka Balang Katholik kaba la lah ban leh bun ki kam ba bha ym tang ha ri lum Garo hynrei ha ka jylla hi baroh kawei.
U Myntri Rangbah ka Jylla ula pynpaw ïa ka jingsngewnguh ïa ka Balang Katholik ha ka jingkren hapoh ka jingïaseng rakhe ïa ka Jubili Ksiar jong ka Tura Diocese mynta ka step Sngi U Blei hapdeng ki hajar phew ngut ki riewngeit ka Balang.
ïa ki phew hajar ki riewngeit ka Balang Katholik ka Ri-lum Garo, ka 5 tarik Naiwieng ka dei ka sngi ban sah jingkynmaw beit ha ka mynsiem bad ka jingmut jingpyrkhat jong ki naba ka dei ka sngi ainguh ïa u Blei halor ka jingwan jong ka Balang hapoh ka thaiñ-ka Tura Diocese, ka Balang Katholik ba nyngkong eh bala wan ha u snem 1973.
ïa kane ka sngi la rakhe da ka jingkmen, ka jingphuh jingphieng ha kaba ki riewngeit na baroh ki kyndong kynshrot ka ri-lum Garo ki la ïa wan naduh ka por 7 baje mynstep ban ïashimbynta ha ki prokram ba kyrpang kynthup ïa Eucharist.
Ka dei ruh ka sngi ban phaidien bad kynmaw ïa u missionary ba nyngkong eh uba la wan ïuhkjat ha Ri-lum Garo ha u snem 1933 ban ïalap ïa ka Gospel bad seng nongrim ïa ka Balang ba kan pynphriang ym tang ïa ki kam Balang hynrei wat ha ka pule ka dangle bad ki lad sumar sukher ha ka koit ka khiah.
U Archbishop ka Guwahati John Moolachira ula ïalam ïa ka Eucharist ban rakhe bad kyrkhu ïa ka jingrakhe jubili ksiar jong ka Tura Diocese ha ka por mynstep.
U Myntri Rangbah ka Jylla u Conrad K Sangma, uba la hiar kyrpang na Shillong mynta ka step, ula ïashim bynta ha kane ka jingrakhe jubili ksiar bad ai jingkren ha ka cultural prokram.
Ula ong ba mynta ka sngi ka dei ka sngi ainguh ïa u Blei Nongbuh Nongthaw da ki riewngeit kiba la mad ïa ki jingjop ba kat une u mawmer jong ka Balang.
ïa u Myntri Rangbah la synran da ka MP ka Lok Sabha na Tura ka Agatha K Sangma, u Lamphang ka ïingdorbar Thaw Aiñ ka Jylla u Thomas A Sangma, u CEM ka GHADC u Albinush Marak bad kiwei ki MLA bad MDC.
U Myntri Rangbah ula ai khublei kyrpang ruh ïa u Bishop ba la shakri slem duh jong ka Tura, u Bishop Emeritus George Mamalassary, uba dei u nongai buit ha lyndet ka jingseng ïa bun bah ki skul bad ki dispensary ha kylleng ki jaka ka Ri-lum Garo mynba u dang long u Parish Priest bad hadien kum u Bishop ka Tura.
U Myntri Rangbah um shym la klet ruh ïa ka synñiang jong ka Tura Diocese sha ka koit ka khiah, kaba la lam khmat ha ka jingïakhun ïa ka khlam Covid, ka jingplie ïa ka Pastoral Centre ha Tura ban ai jaka sah ïa bun ki nongpang Covid ba kin ïoh jingsumar bad ruh ban sam ïa ki lad jingiarap kum ki marbam sha ki briew kiba donkam jingïarap ha ka por ba treikam ka pakhang shnong.
Ka Parish ba nyngkong eh ba la seng ha Ri-lum Garo ka dei ha Darma (mynta ha Assam), Dalu, Baghmara, Tura, Rongjeng bad Resubelpara. Mynta kila don haduh 47 tylli ki Parish hapoh ka thaiñ.