Khyrwit tyngeh ka NGT ïa ka MPCB halor ka jingbym lah ban pynbiang ïa ki kam kiba ïadei bad ki karkhana Coke ha EJHD

Khliehriat iaiong 12: Ka National Green Tribunal (NGT) Eastern Zone Bench ka la khyrwit tyngeh ïa ka Meghalaya State Pollution Control Board halor ka jingai por jong ka ïa ki karkhana coke kiba trei beaiñ ha East Jaiñtia Hills Distict, kaba long katkum ka jingujor u bah Pynbait Sutnga uba dei u Secretary jong ka ECC Elaka Sutnga.
Ha ka por ba pynlong ïa ka Hearing hynnin ka sngi, ïa ka Affidabit jong ka MSPCB la pynsngew ha iïngbishar, kane ka affidavit pat ka dei kaba khlem pynpaw eiei ruh ïa ka Environmental Compensation kaba dei ka jingdaiñ kuna ïa kito ki karkhana coke kiba pynkheiñ ïa ki aiñ pynneh mariang, la ong ruh ba mynta ka NGT ka la ai por biang sa ar taiew ba dei ban pynpoi ïa kitei ki khajna kiba la buh ba kitei ki karkhana beaiñ ki dei ban siew.
Katkum ki kaiphot jong ka MSPCB la ong ba ïa ka Jaiñtia Coke Industries ka tnat ka khlem pat leit ban jurip ha kaba kin sa leit pat ha kawei ka por.
Ha kaba iadei bad ki san tylli kiwei pa ki karkhana coke kiba don ha East Jaiñtia Hills District ka Meghalaya State Pollution Control Board ïa kine ruh ka khlem pyndep ïa ka jurip da kaba ong ba ka jingujor ïa kitei ki karkhana ka dei halor ka jingpynkheiñ ïa ka Consent to Establish(CTE) bad ka jingpynkheiñ ïa ka Consent To Operate (CTO).
Ka NGT ka pynpaw ruh ba ‘ka jingpyntrei ïa ki karkhana coke kaba khlem ka Environmental Clearance ka dei beit ka jingpynkheiñ ïa ki aiñ pynneh mariang (Prevention and Control of Pollution) Act, 1974 Air (Prevention and Control of Pollution) Act 1981 bad ka Environment (Protection) Act 1986.
Katkum ka hukum, ka NGT ka bthah ba lada ka MSPCB kam lah ban pynpoi (file) hapoh ka 27 tarik mynta u bnai, u Member Secretary jong ka MSPCB da lade hi u hap ban wan hajir hakhmat ka ïing bishar ha kawei pat ka hearing kaba yn sa khot.
Lah ban pynkynmaw hangne, ba u bah Pynbait Sutnga myn ha ka 25 tarik u risaw 2021 u la buh ïa ka jingkyrpad (petition) hakhmat ka NGT Eastern Zone da kaba kynnoh ba ki karkhana coke kiba pyntrei beaiñ kiba don hapoh ka elaka Sutnga ki dei kiba buh jingma ïa ka mariang bad ïa ka koit ka khiah jong ki paidbah ka thaiñ bad ong ruh ba kitei ki karkhana ki dei kiba jngai tang kumba 100-300 meter na ki shnong ba shong briew.