Shillong, Jymmang 11 : U MLA jongka Mawlai Constituency u bah Process T Sawkmie ula kyrpad ïa ka sorkar ba kan khot ïakren noh ïa ki Nonghikai hapoh ka lama Federation of All School Teachers of Meghalaya (FASToM) namar dei tang ha ka miej jingïakren ba lah ban ïa pynbeit bad ïakren sngewthuh halor ki mat jingdawa jong ki Nonghikai.
Haba ïakren bad u nongthoh khubor na Delhi da ka phone u bah Process u la ong “ Nga da kyrpad jur ïa ka sorkar ba kan khot ïakren ïa ki nonghikai hapoh ka lama FASTOM namar dei tang hakhmat ka miej jingïakren ba lah ban ïa pynshai mar kylliang. Hooid ka sorkar ka la pynpaw ba ka dang bishar bniah ïa ki jingdawa namar ka hap ban buria pisa da ki klur tyngka bad kam long kaba suk ban shu rai kyrkieh, hynrei lada khot ïakren ïa ki nonghikai bad pynshai ïa ki nga ngeit skhem ba kiei kiei baroh kin poi sha ka jingïasngewthuh jingmut bad ba ki nonghikai kin ym pynlong shuh ïa kino kino ki prokram jingïakhih jongki”.
Nalor kane u la ong “ Nga ngeit skhem ba ki Nonghikai ruh kin ym pynpaw ka jingpyrshah lada ka sorkar ka pan por na ki ban bishar bniah ïa ki jingdawa jongki khamtam ban khot jingïalang naduh ki heh ka Planning bad Finance ban ïamir jingmut halor kine ki mat jingdawa jongki. Namar lada ïakynduh bad iakren sngewthuh kan pher bak lybak ban ïa kaba kiar bad ban ym khot ïakren ïaki”.
Ha ka jingshisha ka FASTOM ka la pan por na u Myntri Rangbah ban ïa kynduh naduh ka 1 tarik mynta u bnai hynrei haduh mynta ruh ka ophis u Myntri Rangbah kam pat ai jubab ïa ki kumta kim banse ban ïaid shakhmat da ki prokram jingïakhih kiba tyngeh da kaba kila rai ban thiah miet noh ha surok.
Na ka liang ka FASTOM ka la dawa ba ka sorkar kan siew tulop noh ïa ki da ka Deficit Pattern ne Deficit System, hynrei halor kane na ka liang u Myntri ka tnad pule puthi u ma Lahkmen Rymbui ula dep pynshai ba ka sorkar kam lah ban siew ïa ki kumba ki la dawa namar ka sorkar ka don hapdeng ka jinghiran pisa. Hynrei na ka liang u Myntri Rangbah u la kular ban khot ïakren ïa ki tangba kan long tad hadien ba la dep ïakren shwa bad ki heh ka Planning bad Finance ban tip ïa ka jinglong jingman ka pla tyngka ka jylla.
Dei na kata ka daw ba u MLA jongka Mawlai u la kyntu ïa ka sorkar ban khot ïakren ban ïapoi sha ka jingïasngewthuh jingmut la ka long ha kano kano ka rukom ruh.
